Blinde avonturier maak korte mette van uitdagings
Vir die blinde Carl de Campos van George, is geen uitdaging te groot nie. Op Vrydag, 1 Maart, het die 48-jarige De Campos nog een van sy geweldige lang emmerskoplys avonture afgemerk toe hy die Mosselbaai glykabel (zipline - in die ou dae is sommer van 'n foefie slide gepraat) aangedurf en voltooi het.
Blind van geboorte, het hy nog nooit van enige uitdaging teruggedeins nie. En soos hy ouer geword het, het die uitdagings van die een tot die volgende uiterste gegroei.
Die glykabel-avontuur het hy as 'n lekker ervaring beskryf. De Campos sê hy het 'n groot ondersteuningsnetwerk, wat hom altyd help en bystaan.
Borg
Dit sluit in sy borg, Swannie Swanepoel, wat ook die hoof ingenieur van die glykabel is, en natuurlik sy vriend Theuns Elof en dié se vrou, Elsje. Theuns en Elsje het ook die glykabel-ervaring gedeel met Elsje agter die kamera.
Van die ander uitdagings, wat hy al voltooi het, sluit in die Comrades Ultramarathon, wat hy in 2000 saam met die Johannesburg Harriers aangedurf het.
Dan het hy ook die Argusfietstoer (deesdae die CTCT - Cape Town Cycle Tour), die uitmergelende Fauresmith Uithourit met langafstand perde, die Blaauwkrantz rekspring, die Drakensberg swaaispring, wat 'n vryval van 17 meter insluit terwyl hy ook al abseil teen die kranse van die Magalies- en Drakensberge gedoen het.
Vir hoogtes is hy ook nie bang nie en het hy al verskeie van die meer bekende klimme soos die George-, Losberg-, Tierkop- en die Van Dalenpieke op sy kerfstok.
Hy het ook al verskeie voertuie bestuur op afgeleë paadjies, 'n vliegtuig se beheer in die lug oorgeneem terwyl vierwielmotorfietsry vir hom glad nie vreemd is nie. Met sy groot voorliefde vir treine, het hy by die Germiston stasie al met 'n lokomotief se kontroles deurmekaar geraak terwyl hy ook op 'n hooflyn onder toesig met 'n dieseltrein vertrou is. Hy het ook in Perth, Australië, die IFly binnenshuise gekrontoleerde valskermsprong gedoen.
Mosselbaai na George aflos
Koekemoer, Sean Snyman, en De Campos 'n Mosselbaai na George aflos gedoen. Koekemoer het van Mosselbaai met ‘n kunsbeen tot op Groot-Brakrivier gery waar De Campos oorgeneem het. De Campos het gedraf en is gelei deur voertuie waar hy óf agter die klank aangedraf het óf aan 'n kantspieëltjie vasgehou het. Naby die George-lughawe het Snyman die laaste skof voltooi tot in George se sakekern.
"Een van die uitdagings wat ek volgende wil doen is om tandemvalskerm te spring en die nuwe K3 Zipline van 3,2km by Caledon, wat deur Swanepoel ontwerp is, te gaan doen," sê De Campos.
Hy het ná skool 'n IT-rigting ingeslaan en hou baie van databasisse. Te midde van al die opwinding, moes hy ook al teleurstellings verwerk soos met sy aflegging in 2021 by sy vorige werkgewer. Die afsterwe van beide sy ouers was ook erge laagtepunte.
Die geleentheid om by die Blinde Instituut van Tegnologie (BIT) opleiding te ontvang in die Salesforce program, het hy met albei hande aangegryp. Dié opleiding sluit ook databasisse in. Tans is hy as vakleerling by BIT vir twee jaar betrokke waarna hulle hom dan in 'n pos sal uitplaas.
Stokperdjies
Die man het ook geen tekort aan stokperdjies nie. Met 'n iPhone, wat 24/7 by hom is en met van die nuutste toepassings spog, is sy selfoon soos sy eie persoonlike gidshond. Hy vertel ook dat baie van die toestelle in sy tuinhuis in George soos sy wasmasjien, hoëtroustel, en alarmstelsel met 'n toepassing op die foon beheer word.
Hy het 'n groot versameling treine en lokomotiewe in sy motorhuis stuk-virstuk opgebou en spore, bedrading en uitlegte self gedoen.
Soms speel hy tromme, luister na flieks, luister musiek, sny self sy gras, plant en krap in die tuin rond, maak die huis skoon, en kook.
Hy beskou kook egter nie as een van sy sterkpunte nie. Hy kan self braai as hy wil, maar verkies dat hy vriende nooi en dat hulle dan braai.
Met 'n sprankelende persoonlikheid en 'n sin vir humor het hierdie man se lus vir 'n uitdaging, ten spyte daarvan dat hy niks kan sien nie, geen einde nie.