Voorgestelde Danabaaitransaksie gaan nie voort
Ofskoon gemoedere in die raad hoog geloop het met die hantering van dié spesifieke item, was daar geen besware teen die aanbeveling dat 'n gedeelte van Erf 6393, Danabaai, nié vervreem word nie.
Dít was by die eerste ope raadsvergadering vir die jaar op Donderdag, 29 Februarie. Die item is vir ongeveer 30 minute tussen die onderskeie partye bespreek voor die speaker die punt afgesluit het.
Die volledige raadsvergadering is op die munisipaliteit se YouTube-kanaal (https:// www.youtube.com/watch?v=Occvr7zF3vA) beskikbaar. Die bespreking van dié item kom voor ná 5 ure en 10 minute in die video.
Die volledige lys van besware en ander kommentaar, as anneksdokumente aangeheg, kan ook aanlyn besigtig word op die munisipale webblad. Kry die agenda vir die beplanning en ekonomiese ontwikkeling komitee-vergadering by https://www. mosselbay.gov.za/document-view/ bcd65dc8-c07b-4745-9e09-9b95f94d27d4.
Verklaring
Na afloop van die vergadering het die DA se Mosselbaai-koukus 'n verklaring uitgereik waarin hy, onder meer, weer eens benadruk het die korrekte prosesse is gevolg in lyn met die Batebestuursbeleid asook publieke deelname; beweer opposisiepartye het die publiek mislei; sê hy "ag dit verwerplik dat opposisiepartye kleinlike politieke munt probeer slaan het uit die familieverbintenis"; en spesifiek punt agt van die aanvanklike item benadruk.
"Sou die opposisie voorwaarde 8 van die raadsitem van 30 November met begrip gelees het, sou hulle besef het dat die verhandeling van die grond slegs met die instemming van die twee huiseienaarsverenigings ter sprake sou kon voortgaan."
Beide die ACDP en VF Plus, uit wie se oorde baie van die kritiek teenoor die item gekom het, hou op hul beurte vol dit was die DA se plan om die gedeelte erf te vervreem en dat niks sonder hul goedkeuring gebeur nie.
Opposisie
Die ACDP sê opsommend is sy punte as volg:
Die DA het die item goedgekeur terwyl die opposisie teen dit gekant was, opposisie partye het die publiek gemobiliseer om beswaar te maak, slegs tóé het die DA aanvaar hul voorstel is deur die publiek verwerp en probeer nou hul aansien in die publieke oog herwin, en laastens dat die vervreemding van die grond nie in die belang van die publiek was nie.
Die VF Plus se reaksie was op dieselfde trant en het op sy beurt gesê die DA gebruik boelietaktiek deur konstant opposisiepartye te wil verkleineer. Die party sê hierdie kwessie het die publiek laat besef die mag is in hul hande en hy hoop dit het inwoners bewus gemaak van hoe belangrik dit is om raadsagendas en vergaderings te volg.
Die party ontken ook dat hy ‘n prentjie probeer skets het dat die transaksie reeds afgehandel is. "Die VF Plus sal aanhou om die transaksies en intensies van die DA dop te hou."