Pragtige skildery aan bejaardes geskenk
Ferdi Pieterse het verlede week Donderdag, 29 Februarie, by die Hartenbos Versorgingsoord gaan kuier waar hy 'n skildery geskenk het wat hy gevoel het sal pas by die tema van “Ons bejaardes in die sorg van die personeel van die oord".
Die pragtige skildery van Pieterse is spesiaal deur Exclusive Framing vir die versorgingsoord geraam en vertoon 'n bejaarde vrou wat lyk of sy by 'n venster uitkyk met sonlig wat op haar gesig val. "Vir my vertel die skildery die verhaal van 'n bejaarde wat sit en staar in die verte en wag vir besoekers of familie om te kom kuier," sê Swanepoel.
Bestuurder van die Hartenbos Versorgingsoord, Johan Jacobs en suster Ebenja Maritz, kon nie uitgepraat raak oor die pragtige skildery nie. Jacobs wou eers die skildery in die siekeboeg gaan hang, maar het besluit die mooi skildery gaan voorportaal toe en het sommer dadelik daarvan werk gemaak.
Pieterse het aan die einde van 2019 as adjunkhoof by Hoërkool Punt op Mosselbaai afgetree. Hy was jare die Fisiese Wetenskaponderwyser vir gr 9 tot 12. Pieterse sê hy is maar 'n selfontwikkelde kunstenaar en kon gedurende sy jare in die onderwys bitter min tyd aan sy kuns afstaan.
"Met my aftrede het ek voltyds begin skilder. My medium is olieverf, en ek skilder ‘n wye verskeindenheid temas. Ek skilder ook kommissiewerk soos deur kliënte aangevra," sê hy.
Van sy hoogtepunte in sy kort skilderloopbaan is dat die Afrikaanse Taal en Kultuurvereniging van sy skilderye gekoop het, waarvan enkeles in ‘n permanente uitstalling in die Voortrekkermonument hang.
Hy het ook al derde geëindig in ‘n landwye skilderkompetisie.