Camino verken die Klein-Karoo se stories
Die Klein-Karoo is 'n streek vol stories. Veral stories oor die mense wat hier gewoon, lief gehad en gewerk het. Hulle het hul geloof uitgedruk in die bou van pragtige sandsteenkerke, katedrale en sinagoges, wat vandag nog tasbare monumente van hul erfenis is.
Pelgrims kan vanjaar die geleentheid kry om ten bate van Solidariteit Helpende Hand dié geskiedkundige huise van aanbidding te besoek as deel van die Camino van die Sandsteenkerke. Dié Camino is 'n unieke staproete wat pelgrims nie net met die verlede sal verbind nie, maar ook met hulself en mekaar.
Die Camino van die Sandsteenkerke is 'n inisiatief van die Klein Karoo Camino, 'n organisasie wat verskillende staproetes in die streek aanbied om mense te inspireer om hul lewens te vernuwe en te verryk.
"Solidariteit Helpende Hand is bevoorreg om by dié staptog vir die siel betrokke te kan wees. Die Camino van die Sandsteenkerke fokus spesifiek op die kulturele en spirituele aspekte van die Klein-Karoo en neem pelgrims op 'n reis deur die verskeidenheid kultuurskatte, wat hier ontstaan het," sê Alisha de Lange, Solidariteit Helpende Hand se streeksbestuurder van die Wes-Kaap.
Die sirkelroete strek oor sowat 190 km, maar pelgrims kan ook korter of langer roetes aandurf.
Nuwe roetes oor langer afstande word tans ontwikkel om aan ervare stappers meer opsies te gee. Elke Camino eindig op Oudtshoorn, die hart van die Klein-Karoo. Die pelgrims stap deur die geskiedenis, kultuur en natuurskoon van die streek en besoek verskeie plekke van aanbidding, besienswaardighede en unieke landmerke.
"Die doel van die pelgrimstog is om 'n geestelike, fisieke en emosionele ervaring te bied wat die pelgrims nader aan hulself, mekaar, die natuurskoon en God bring. Die einddoel is om die nodige fondse in te samel vir verskeie projekte van Solidariteit Helpende Hand Wes-Kaap-streek om Afrikaanse gemeenskappe te ontwikkel en te versterk," sê De Lange.
Om te stap, tap energie en daarom word alle maaltye verskaf en is dit vullend, gesond en smaaklik. Gaste kan uitsien na driegangmaaltye plus heerlike versnaperings op die roete.
Pelgrims kan die volgende hoogtepunte op die hele sirkelroete beleef; Sinagoges, St. Saviour Katedraal, St. Judes Anglikaanse kerk, NG Moedergemeente Oudsthoorn, Bybelse Tuin, Kango Bergoord, Rust-enVrede Waterval, sterrekyk, Spitskop en Oudemuragie, De Rustica Olyfplaas, die Lydensweg (Via Dolorosa), die historiese swaaibrug en volstruispaleise.
Vir meer inligting besoek die Klein Karoo Camino webwerf by www. kleinkaroocamino.co.za of stuur ’n WhatsApp-boodskap na 071 209 1977.