Jeug gee hupstoot vir Herbertsdale
Oud en jonk het die afgelope naweek nadergestaan toe die Mosselbaaimunisipaliteit en sy vennote ‘n pretdag op Saterdag, 2 Maart, op Herbertsdale aangebied het. Die munisipaliteit se kantoor vir jeug- en sportontwikkeling, die WesKaapse regering e-sentum, asook Wonderful SA het saamgespan om ‘n feestelike dag propvol aktiwiteite by Laerskool Herbertsdale se sportveld aan te bied.
Daar is boeresport speletjies gespeel wat sakresies, eier-in-die-lepelresies, asook toutrek ingesluit het. Mini- en handvoetbal, netbal en raakrugby het ook getalle deelnemers getrek en selfs die domino’s is uitgepak.
Die dorp se senior burgers, asook die Aloegroep vir gestremdes het seker gemaak dat hulle nie dié pretdag misloop nie. Nagenoeg 120 Herbertsdalers het aan die program deelgeneem, waaronder ook een van die dorp se oudste inwoners, Theo Cupido (83) alombekend as Oom Stompie.
Die dag het egter nie net oor sport en “sports” gegaan nie, maar die geleentheid is benut om ‘n opvoedkundige boodskap oor middelafhanklikheid oor te dra.
Setchmor Rhoodes, van die munisipaliteit se kantoor vir landelike ontwikkeling, asook ander sprekers het die Herbertsdalers toegespreek. Rhoodes is betrokke by die fasilitering van die Plaaslike Dwelmaksiekomitee, oftewel LDAC. Wonderful SA het ‘n opvoedkundige teaterstuk opgevoer om die negatiewe effek van ‘n gebrek aan ondersteuning binne die gesinskonteks te illustreer.
Die volgende program, aangebied deur die Mosselbaai-munisipaliteit, sal in die Maartskoolvakansie plaasvind.
Nuwe speelpark
Nog ‘n hoogtepunt op Herbertsdale die week, is die amptelike opening van ‘n nuwe speelpark op die dorp tydens ‘n besoek van die uitvoerende burgemeester van Mosselbaai, raadsheer Dirk Kotzé. Die nuwe speelpark is verlede maand voltooi, na ‘n lang proses in gesprek met die wyksraadslid en wykskomitee om genoegsame begroting te bekom waarna ‘n plek vir die vestiging van die park bepaal is. Die speelterrein is ingerig langs ‘n gebou, wat volgens ‘n raadsbesluit aan die Herbertsdale-buurtwag verhuur word. Bo en behalwe dat die speelplek onder die waaksame oog van die buurtwag is, is die perseel ook deur die munisipaliteit omhein vir veiligheid.
Tydens die burgemeester se besoek, is nog ‘n spesiale geleentheid gehou by Laerskool Herbertsdale, waar ‘n lewenskragtige tuin aangelê is met behulp van die Belgiese nie-winsgewend organisasie, Drops (Direct Relief of Poverty & Sickness Foundation). Verteenwoordigers van Drops, Harry en Marianne Graf was ook teenwoordig om dié projek se vordering te sien.
Drops bestaan uit vrywilligers wat fokus op die ondersteuning en bevordering van onderwys, gesinsorg, infrastruktuur en ontwikkeling. Hulle doelwitte sluit onder meer ook volhoubare voedselvoorsiening in. Drops het, in samewerking met die munisipaliteit se kantoor vir landelike ontwikkeling in Oktober 2023, tuingereedskap, ‘n hoeveelheid groenteplantjies, saad en vrugtebome aan Laerskool Herbertsdale geskenk.
Die ondersteuning van Drops het 'n beduidende rol gespeel in die verbetering van die skoolomgewing, die verskaffing van waardevolle leergeleenthede aan die skoliere, en het boonop verseker dat die skool se koshuis van vars groente verskaf is, wat hulle self verbou het.
Die Herbertsdale-projek, is Drops se vyfde projek sedert 2018 in samewerking met die munisipaliteit, ten einde die gemeenskap te bemagtig.
Die projekte op Herbertsdale gee opnuut uitdrukking aan die Raad se strategiese doelwitte binne die GROEI-strategie, naamlik die bevordering van ‘n gesonder, groener omgewing, gemeenskapsveiligheid en maatskaplike herlewing.
Die perseel is ook deur die munisipaliteit omhein vir veiligheid.