Paviljoen se herstel sal ná die seisoen voltooi word

Na ‘n deeglike konsultasie met die twee kontrakgebruikers van die D’Almeida Stadion, Barbarians-rugbyklub en Hoërskool Sao Bras, is tot die vergelyk gekom dat die paviljoen eers ná die rugbyseisoen herstel sal word. Die paviljoen is tydens stormwindtoestande verlede jaar in September beskadig nadat van die dakplate losgeruk is.

Na ‘n proses van onderhandeling met die munisipaliteit se versekeraars, is tot die gevolgtrekking gekom dat die kontrak vir die herstelwerk, wat ongeveer R900 000 beloop, op tender sal uitgaan. Die tenderproses kan tot vier maande duur voor toekenning waarna die herstelwerk in aanvang kan neem. Met die herstelwerk, sal die paviljoen vir minstens ses weke, en die stadion vir ongeveer drie weke nie deur die publiek gebruik kan word nie.

As gevolg van hierdie tydsduur wat die rugbyseisoen negatief sal beïnvloed, het beide Barbarians en Sao Bras versoek dat die herstelwerk eers na alfoop van hul sportbedrywighede moet plaasvind.

Hoërskool Sao Bras is vanjaar 60 jaar oud en beoog om hulle feesvieringe by die D’Almeida Stadion te hou, dus sal dit ook vir hulle voordelig wees, sou die herstelwerk later vanjaar in aanvang neem.

Oktober

Daar is dus ooreengekom dat die herstelwerk waarskynlik eers in

Oktober, na afloop van die Mosselbaai Sport- en Rekreasiefees en spesifiek die Burgemeesterstoernooi, wat vanjaar op D’Almeida gespeel sal word, sal plaasvind.

Sou die herstelwerk in Oktober vanjaar begin, word die voltooiing daarvan in middel-Desember in die vooruitsig gestel.

Samesprekings oor die herstelwerk het op Maandag, 4 Maart, plaasgevind tussen Barbarians Rrugbyklub, Hoërskool Sao Bras en die munisipaliteit, verteenwoordig deur die uitvoerende burgemeester, raadsheer Dirk Kotzé, die munisipale bestuurder, Colin Puren, raadsheer Niklaas Booisen, portefeuljebestuurder van gemeenskapsdienste en die direkteur gemeenskapsdienste, Elize Nel.

“Ons is dankbaar dat daar nou uitsluitsel oor die pad vorentoe is. Die munisipaliteit bedank Barbarians, asook Sao Bras vir hulle gesindheid en samewerking. As deel van ons GROEI-strategie, is die ondersteuning van maatskaplike herlewing deur middel van sport vir die Raad baie belangrik. Ons bedank ook die publiek, die toeskouers wat sportgeleenthede bywoon vir hulle geduld tydens die proses en ons vra om verskoning vir enige ongerief wat veroorsaak word,” noem raadsheer Niklaas Booisen, wat ‘n groot rugbyentoesias is.

Die stadion is veilig vir publieke gebruik en sportoefeninge duur voort. Mosselbaai-munisipaliteit