Landelike gemeenskapsveiligheid vir Mosselbaai-area
Op 1 en 2 Maart het ongeveer 50 persone van verskeie veiligheidsorganisasies in die Mosselbaai munisipale area byeen gekom om insette te lewer in die daarstelling van ‘n landelike Gemeenskapsveiligheidsteunkring vir Mosselbaai, wat in staat sal wees om aktiewe gebiedsbeskermingsoperasies ter beveiliging van die gemeenskap uit te voer.
Dié werksessie is deur AfriForum se Mosselbaai-tak geïnisieer en deur genlmaj (afgetree) Roland de Vries gefasiliteer. Generaal De Vries is ‘n voormalige adjunk hoof van die SA Leër, en sekerlik dié kenner van gebiedsbeveiliging in Suid-Afrika. Hy is ook die outeur van die boeke Veiligheid vir Gemeenskappe, Mobile Warfare for Africa en
Eye of the Thunderstorm. Groot dank gaan ook aan uitvoerende burgemeester, Dirk Kotzé wat die Saterdagsessie bygewoon het.
‘n Gemeenskapsveiligheidsteunkring is daarop gemik om gemeenskappe te bemagtig om selfbeskerming na te streef, dit impliseer moed en deursettingsvermoë om eie potensiaal te ontwikkel om misdaad effektief te help bekamp. Dit word beklemtoon dat alles wat die gemeenskap ter selfbeskerming aanpak, professioneel, korrek en wettig is, daar word ten alle tye gepoog om dit in samewerking met die SAPD en alle relevante rolspelers te verwesenlik.
Gedurende die werksessie, was ‘n terreinwaardering gedoen, wat tot die identifisering van verskeie sektore gelei het waaaruit veiligheidseenhede moet voortspruit. Generaal De Vries het hieruit 'n breë operasionele plan sowel as steunplanne ontwikkel wat verder deur 'n aangestelde projekspan, onder leiding van Murray van der Merwe die leier van Groter Brandwag Plaaswag, verfyn en gedurende die volgende twee jaar sal uitbou en finaliseer. Die idee is om die landelike komponent met dié van Mosselbaai-dorp se veiligheidsbestel te integreer. Een van die groot pluspunte is dat die munisipaliteit reeds oor ‘n gesamentlike operasie-sentrum (GOS), beskik, wat die doelgerigte beplanning en koördinering van veiligheids-operasies kan help rig en koördineer.
Vir enige navrae kan Louis Cook (082 097 4560) gekontak word.