Wykskomitees bou kapasiteit
Die Mosselbaai-munisipaliteit se openbare deelnamekantoor en die direktoraat infrastruktuur het verlede naweek kragte saamgesnoer waar wykskomitees op 'n opvoedkundige toer van noodsaaklike munisipale infrastruktuur geneem is. Die wykskomiteelede van Mosselbaai se 15 wyke, woon elke kwartaal 'n spanbousessie by. Die wykskomitees speel 'n noodsaaklike rol in die kommunikasienetwerk tussen die munisipaliteit en die inwoners, en 'n toer deur die munisipale infrastruktuur stel hulle dus in staat om eerstehands verslag te gee van hul ervaring en waarnemings.
Die toer deur munisipale infrastruktuur was 'n eerste en die terugvoer was oorweldigend positief. Infrastruktuurpersele wat besoek is, sluit in Mosselbaai se bekroonde ontsoutingsaanleg in Voorbaai, die Sonskynvallei-substasie, Hartenbosrioolsuiweringswerke, en Klein Brakwatersuiweringsaanleg. Direkteur
Dick Naidoo (infrastruktuurdienste) en senior bestuurder elektriese dienste, Morné Olivier, het hul kundigheid gedeel terwyl die portefeuljevoorsitter vir infrastruktuurdienste, raadslid Anton Dellemijn, ook die groep vergesel het.
"Ek is verheug oor hierdie innovasie in hoe ons ons wykskomitees bemagtig. Dit versterk die praktiese bydraes wat ons voorheen gedoen het deur ons wykskomiteelede nader te neem aan van die kernfunksies van die munisipaliteit, wat infrastruktuur verskaf en dienslewering verseker,” het die Speaker, raadsdame Venolea Fortuin, wat die wykskomiteestelsel voorstaan, gesê.
Vervoer is voorsien en drie opvoedkundige sessies sal gehou word om al die wykskomiteelede te akkommodeer. Die afgelope naweek het wyke 1 tot 5 aan die beurt gekom, met wyke 6 tot 10 en wyke 11 tot 15, wat onderskeidelik vir 9 Maart en 23 Maart geskeduleer is.