‘n Advertiser uit die jaar 1953
Mense klop dikwels by 'n koerant aan om deur die argiewe te gaan, maar dis selde dat 'n gemeenskapslid die argiewe na die koerant toe bring.
Maryna Bothma (voorheen Muller) het onlangs by die Mossel Bay Advertiser kom aanklop met 'n koerant uit 1953. Die Vrydag-uitgawe van die Mossel Bay Advertiser op 24 Julie 1953, om presies te wees.
Dié spesifieke uitgawe, vertel Bothma, het sy tussen haar ma, Pollie Muller, se besittings gekry. Oral waar Bothma nou al rondgetrek het, het sy maar die koerant in sy geel koevert met haar saamgeneem.
By nadere ondersoek sien mens ook hoekom haar ma die koerant sou bêre. Dit was dalk nie soseer oor die wolpryse of daardie tyd se interessante advertensies nie, maar die stukkie op die agterblad oor die bevestiging van die huwelik tussen Maria (Pollie)
Barnard en Arthur Muller; Bothma se ouers natuurlik.
"Die bruid het pragtig daaruit gesien toe sy die kerk binne gekom het aan die arm van haar vader. Sy het 'n lieflike rok van wit 'embossed' satyn, hoë kraag met lang moue, baie wye romp, langsleep en sluier aangehad. Haar hooftooisel en ruiker was van wit vars rose," lees die stukkie.
Daar word verder uitgebrei oor die strooimeisies en blommemeisie se uitrustings, asook wie hulle en die strooijonkers was. 'n Ene mev. Looch het die egpaar in die kerk toegesing en ds Pietersen het die plegtigheid waargeneem in die NG Kerk op 18 Julie.
Volgens die beriggie het die jong paartjie hulle in Venterstad naby Colesberg gevestig. Beide Pollie en Arthur is in 1991 oorlede.