Hiér is die deelnemers vir blinde navigatorstydren
Die tweede blinde navigatorstydren vind vanjaar op 6 April plaas.
Die St Blaize Lionsklub het dié geleentheid verlede jaar vir die eerste keer die geleentheid na die Tuinroete gebring.
Die blinde navigators gebruik 'n brailleroeteskedule en moet daarvolgens vir die bestuurder van die voertuig aanwysings gee. Hulle sal by Salt & Copper begin met die tydren. Die organiseerders het profiele vir vier van die blinde navigators met die Mossel Bay Advertiser gedeel.
Een deelnemer, Cheryl Kruger, is sedert Junie 2023 'n afgetredene. In haar tyd by Absa, was een van haar groot hoogtepunte haar benoeming as diensheld van die maand in Maart 2006.
Sy is in haar vrye tyd betrokke by die organisering van bestuurders en navigators vir die vier tydrenne vir blindes in die Kaapomgewing. Oor die nuwe Mosselbaai-tydren is sy baie opgewonde.
Bonita Blackenberg, was die eerste blinde student om joernalistiek aan CPUT te studeer in 2000. Sy het 'n graad in Joernalistiek en 'n nagraadse sertifikaat in Onderwys. Sy hou skool by die Athlone School for the Blind, maar radio is haar passie. Bok Radio is sedert 2016 haar huis.
Frankford Williams is 'n skakelbordoperateur by die 2 Militêre Hospitaal in Wynberg. Hy is passievol oor sport vir siggestremdes. Dit leef hy op verskeie maniere uit.
Hy speel doelbal ('n sportsoort spesifiek ontwerp vir siggestremdes), is die voorsitter van die Eersterivier Doelbalklub en lei ook Van der Stel Blind Cricket. Hy dien ook as die sekretaris van die Skiereiland-tak van Blind SA, wat hulle beywer vir die regte van blindes.
Laastens is daar Maruis Coetzee, 'n teologie student, musikant, musiekonderwyser, sportman en sportadministrateur. Deur middel van YouTube-video's probeer hy die publiek inlig rakende die verskillende sportkodes wat daar bestaan vir mense wat leef met 'n gestremdheid.