Barbarians wen riller stryd op D’Almeida Park teen Progress
Die Barbarians het hul klubrugbybepalings in die Suidwestelike Distrikte (SWD) se Premier Liga op hul D'Almeida Park-tuisveld op 'n positiewe noot afgeskop deur met 34-20 met Progress van George af te reken. Die tuisspan het met die rustyd reeds die oorhand met 17-6 gehad, maar 'n tydelike insinking in die tweede helfte het Progess binne trefafstand gebring toe hulle na twee vinnige doele die telling tot 24-20 gevoer het.
Die ergste van dié situasie was dat Progress in daardie stadium danksy 'n geel kaart met 14 spelers gate kon vind om twee keer agter die Babaas se doellyn te kon gaan kuier. Progress het in dié periode ernstige vrae gestel aan die Barbarians se verdediging.
Dit was in direkte teenstelling met 'n veel meer afgeronde vertoning in die eerste helfte waar die samespel tussen die voor- en agterspelers baie goed was en Progress met goeie verdediging uit die tuisspan se doelgebied gehou is. Die Babaas was innoverend genoeg om drie goeie drieë te kon gaan druk in die eerste 40 minute.
Behalwe vir die insinking in die tweede helfte, het die Barbarians gelukkig gou weer hul ritme gevind en die wedstryd afgesluit deur met goeie hanteerwerk nog twee keer agter die besoekers se doellyn te gaan afrond. Net twee van die Babaas se ses drieë kon verdoel word.
Die Barbarians is soos Progress met 'n geel kaart gestraf. Daar sal verseker aandag aan die dissipline gegee moet word omdat geel kaarte 'n al hoe groter impak op die finale uitslae van wedstryde begin speel.
Dit was nietemin 'n goeie afskop om die seisoen mee te begin en die Babaas kan met baie vertroue na die volgende kragmeting uitsien wanneer hulle oormôre in 'n wegwedstryd teen George in George te staan kom. Met 'n paar verstellings hier en daar behoort Barbarians as die gunsteling vir dié tweestryd aan te tree.
Die tweede en derde spanne het teen Progress ook goed vertoon en onderskeidelik met 32-3 en 30-7 gewen.