16 SA rekords spat op Danabaai
Nie eens die dreigende weer kon die ondersteuners keer om op te daag nie. Op Saterdag, 6 April, het Hein’s Gym opslae gemaak op Danabaai met die Metal Madness 2024 Kragoptelkompetisie.
Die uitvoerende onderburgemeester, Alderman Cliffie Bayman, het die verrigtinge geopen met ‘n verwelkoming aan die atlete en die toeskouers. Sy inspirerende boodskap het die toon aangedui vir die dag. Hy het ook die skeidsregters bedank, wat van ver gekom het om hulle kennis en insig met almal te deel.
Dank is ook uitgespreek teenoor Martin Smit, Danielle Viljoen en Jade Duncan vir hulle moeite, tyd en professionele toesig met die verrigtinge wat tot die sukses van die kompetisie bygedra het. Harde werk deur die atlete kan op nasionale vlak erken word vir kwalifisering vir nasionale kompetisies later vanjaar in Johannesburg. Ook om die SA rekords amptelik erken te kry. Rhino Powerlifting Club (RPC) is een van drie federasies met internasionale affiliasie in kragoptel in Suid Afrika, en 16 RPC SuidAfrikaanse rekords is opgestel.
Alderman Bayman het bygevoeg: “Oefening moedig mense aan om gedissiplineerd te lewe, hard te werk en hulle beste te doen. Waar jy volgens ‘n gelyke maatstaf verantwoordelikheid neem vir jou suksesse en jou mislukking. Die enigste kleur wat in hierdie sport saakmaak is die kleur van die gewigte wat op die staaf gelaai word aangesien ‘n kleur aan elke gewig toegeskryf word volgens sy gewig.
Die staaf gee nie wie jy is en waar jy vandaan kom nie. As jy die optel binne die reëls voltooi, staan jy net so ‘n goeie kans soos enigiemand anders om die wenner te wees.”
Die rekords, wat opgestel is, is:
In die meesters mansafdeling het Jan Kruger die rekord opgestel vir hurksit (squat) (250kg) en die rekord vir bankdruk (benchpress) (195kg).
Twee vroue in die meesters-afdeling het rekords verbeter. Alicia Bezuidenhout met rekord vir hurksit (75kg), rekord vir bankdruk (50kg), rekord vir dooiegewig optel (deadlift) (90kg) met 'n totaal van 215kg.
Amanda Labuschagne het die rekord vir hurksit (75kg), rekord vir bankdruk (35kg),rekord vir dooiegewig optel (105kg) met 'n totaal van 215kg verbeter.
By die mans ope het Stephano Reid die rekord vir hurksit (162.5kg), die dooiegewig optel (210kg) met 'n totaal van 462.5kg behaal.
Die mans ouderdomsrekord is deur Christiaan Stander verbeter met 'n dooiegewig optel van 245kg.
Die President van RPC en hoofskeidsregter van die dag, Martin Smit, het dit beklemtoon dat die sport in goeie hande is in die WesKaap
met mense soos Hein en Alida van Hein’s Gym, en promotors soos Jan Kruger aan die stuur van sake. Spesiale melding is gemaak van die kwaliteit van die organisasie, die besondere hulp en bystand van die gemeenskap en klein besighede se bydraes tot die sukses van die kompetisie.
Hy het ook sy dank uitgespreek aan Christiaan en Nathan, die platform span, wat gesorg het dat die deelnemers ten alle tye veilig is. Hein’s Gym beplan om later die jaar nog 'n kompetisie te hou en voornemende deelnemers kan nou al begin met die voorbereiding daarvoor.