DA-koukus verdedig Benevolent Park
Die besluit om 'n nie-winsgerigte organisasie te vorm om veral die benarde finansiële posisie van Benevolent Park aan te spreek, is in onlangse weke in verskeie media vir kortsigtige politieke voordeel deur verskeie opposisiepartye misbruik en emosionele waninligting is wyd versprei oor die raad se gewaande motiewe.
So sê Niklaas Booisen, DA-koukusvoorsitter van Mosselbaai en portefeuljevoorsitter vir gemeenskapsdienste.
Die Mossel Bay Advertiser berig op bladsy 7 oor 'n besoek die afgelope week van Wes-Kaapse provinsiale parlementslid, Cameron Dugmore aan dié instansie. Opposisie partye, onder andere die ACDP het benadruk dat hoewel 'n meerderheidstem verkry is, het die DA die meerderheid in die raad en was alle partye nie ten gunste van die besluit nie.
Tydens die algemene raadsvergadering op 28 Maart het Booisen 'n dringende mosie gebring dat 'n nie-winsgewende maatskappy gestig word vir die bestuur van Benevolent Park.
Dit het gevolg nadat die Mosselbaai Benevolent Vereniging vir Bejaardesorg, die nie-winsgewende organisasie (NWO) wat voorheen Benevolent Park bestuur het, ernstig finansiële uitdagings ervaar het en by beide inwoners en die gemeenskap vrese vir die waarskynlike, naderende sluiting van die oord ontstaan het.
"Die raad het daarom besluit dat 'n nie-winsgewende maatskappy, 'n aparte entiteit, gestig sal word om die doeltreffende bestuur, finansiële lewensvatbaarheid en voortbestaan van die Benevolent Park sonder politieke inmenging te verseker," sê Booisen.
Benevolent Park
Benevolent Park is 'n munisipale entiteit waarvan die grond en verbeteringe aan die munisipaliteit behoort en in belang van al die inwoners van Mosselbaai beskerm en volhoubaar bestuur moet word.
Die inwoners van Benevolent Park verdien die emosionele sekerheid van 'n volhoubare, goed-bestuurde oord sodat hulle sonder sorge oor hul toekoms hul aftrede daar kan deurbring.
'n Besluit oor die toekoms van Benevolent Park het gevolg op indringende, herhaalde samesprekings tussen die munisipaliteit en inwoners, belangegroepe en plaaslike verteenwoordigers van die Provinsiale Departement van Maatskaplike
Ontwikkeling.
Die Raad het op 28 Maart 2024 'n dringende mosie deur die DAKoukusvoorsitter Mosselbaai en portefeuljevoorsitter vir gemeenskapsdienste, Raadsheer Niklaas Booisen aanvaar om 'n nie-winsgerigte organisasie (NWC) te vorm om die benarde finansiële posisie van die oord, die volhoubare bestuur en toekoms van die oord aan te spreek.
Booisen sê nie net is Mosselbaaimunisipaliteit die finansieel-volhoubaarste plaaslike owerheid in die Wes-Kaap nie, maar is ook nog altyd bekend as 'n omgeeinstansie wat na die belange van ál die inwoners omsien.
"Vir etlike jare, sedert 2006 het ook die vorige burgemeesters gereelde klagtes van beide van die oord se inwoners en die gemeenskap ontvang oor omstandighede by Benevolent Park, 'n oord vir bejaardes waarvan beide die grond en verbeteringe aan die munisipaliteit behoort."
Hy sê die klagtes het onlangs meer dringend geword en verskeie belangegroepe het hul tot burgemeester, Dirk Kotzé, gewend met pleidooie dat die munisipaliteit moet toetree om die lot van die oord se inwoners te verbeter sodat hul toekoms en die volhoubare toekoms van die oord verseker kan word.
Volhoubaarheid verseker
"Mosselbaai-munisipaliteit bly toegewyd en sal sover moontlik die volgehoue voortbestaan van Benevolent Park verseker. Dugmore het beweer dat geen aksie geneem is om probleme by die oord op te los nie en dat die inwoners van die oord regverdigheid en 'n oplossing soek. Ingevolge die NWO word juis 'n bestuursmeganisme beoog waar geformaliseerde beheermaatreëls en aanspreeklikheid sal geld, ook vir die munisipaliteit om 'n bydrae tot die oord te kan maak."
Booisen sê die munisipaliteit het 'n formele openbare deelname proses gevolg. "Vier briewe, kommentaar en besware van die D’Almeida Aktiviste-stigting, asook ’n alternatiewe voorstel namens die LJR-groep, is ontvang. Verdere openbare deelname deur die munisipaliteit het gevolg, insluitend samesprekings met lede van die Benevolent Park Bestuursraad en die plaaslike verteenwoordiger van die provinsiale Departement van Maatskaplike Ontwikkeling. Regsadvies is ook ingewing."
Wat volgende?
Na die stigting van die nie-winsgewende maatskappy sal vakante poste ingevolge die Akte van Oprigting gevul word. ’n Bestuursliggaam sal gestig word, bestaande uit inwoners van Benevolent Park, om finansies, administrasie, instandhouding, bedrywighede, tuinmaak, estetika en sosiale aspekte te bestuur.
Hierdie bestuursliggaam sal gereelde vergaderings met die nie-winsgewende maatskappy (NWM) hê om doeltreffende bestuur te verseker.
Die huidige huurooreenkoms tussen die munisipaliteit en die Mosselbaai Benevolent Vereniging vir Bejaardesorg NWO, wat op 30 September 2023 ten einde geloop het, sal op 'n maand-tot-maand basis verleng word totdat die nie-winsgewende maatskappy gestig is.
Sodra die nie-winsgewende maatskappy (NWM) gestig is, sal 'n huurooreenkoms van nege jaar en elf maande tussen die Mosselbaai-munisipaliteit en die niewinsgewende maatskappy gesluit word.
Booisen sê die munisipaliteit het ‘n formele openbare deelname proses gevolg.