Premier en ministers besoek padblokkade op Mosselbaai
Verskeie prominente rolspelers het Vrydag, 12 April, op Louis Fourieweg, 'n padblokkade gehou om motoriste bewus te maak van veiligheid agter die stuur en om die munisipale K9-eenheid in te span vir voertuigdeursoeke.
Onder die verteenwoordigers van die WesKaapse regering was die premier van die WesKaapse Regering, Alan Winde, die LUR vir polisie-oorsig en gemeenskapveiligheid van die Wes-Kaap, minister Reagen Allen, en die LUR vir infrastruktuur van die Wes-Kaap, minister Tertuis Simmers.
Van munisipale kant was die uitvoerende burgemeester van die Tuinroete-distriksmunisipaliteit, Memory Booysen, ook teenwoordig. Mosselbaaimunisipaliteit was verteenwoordig deur die burgemeester, Dirk Kotzé, die direkteur van gemeenskapveiligheid van die Mosselbaaimunisipaliteit, Graeme Lategan, portefeuljevoorsitter vir gemeenskapveiligheid, raadslid Leon van Dyk, Reinet Sarikakis, provinsiale verkeershoof op Mosselbaai en verkeershoof, Henry Williamson, sowel as verskeie munisipale amptenare.
Burgemeester Kotzé het die premier en almal teenwoordig bedank vir hul teenwoordigheid en dat hulle inkoop in die munisipaliteit se plan vir gemeenskapveiligheid.
Raadslid Leon van Dyk het die premier ook bedank vir die ondersteuning met die
honde-eenheid, waarvan onlangs nog twee honde bygekom het en nou op sewe honde en hanteerders staan. "Ons het die gemeenskap gewys dat ons sukses behaal en sal so voortbou," het van Dyk gesê.
Burgemeester Booysen het gesê: "Suksesse is aansteeklik en die GPF, buurtwagte en regering het ingekoop dat ons hondeeenheid, hommeltuie en bote het waarmee ons die hoofstroom-misdaad mee kan bekamp."
Die polisie en verkeer, saam met die K9-eenheid, het die padblokkade beman in samewerking met die span van minister
Allen. Minister Allen het gedurende die padblokkade gesê hy kan nie die krediet neem vir die verwikkelinge met die K9eenheid nie. "Toe premier Winde dié pos beklee het, het hy 'n vermindering van 38% in die K9-eenheid van die polisie waargeneem. Die provinsie wil voortbou op die inisiatief wat die premier begin het," sê Allen.
Premier Alan Winde en sy span het ook die Mosselbaai-munisipaliteit geluk gewens met hul Ratings Afrika-toekenning as die finansieel volhoubaarste munisipaliteit in die Wes-Kaap, en deel hierdie gesogte status met die Midvaal-munisipaliteit in Gauteng in die res van Suid-Afrika. Die Wes-Kaap en meer spesifiek, Mosselbaai, het uitgeblink. Beide munisipaliteite het 74 uit 100 behaal, terwyl Saldanabaai 73, Swellendam op 72 en Swartland 71 punte behaal het. Die jaarlikse verslag sluit 104 plaaslike munisipaliteite, plus die agt metros in Suid-Afrika in.
"Dit begin alles met goeie bestuur en met sisteme in plek kan dienste daarop gebou word," het Winde beklemtoon. "Ons glo ook in vennootskappe. Ons moet ons provinsies veilig kry vir ons inwoners sodat hulle kan investeer in die ekonomie, skool toe kan gaan, gesondheidsdienste kan benut en deel kan uitmaak van ons toekoms in die provinsie."
Winde het ook gesê motoriste moet by padblokkades dankbaar wees dat hulle daar is om ons paaie veilig te maak. Die honde snuif dwelms uit, wat dit ook veiliger vir die gemeenskap maak. Die rolspelers het ook die geleentheid gekry om met van die motoriste, wat by die padblokkade afgetrek is, betrokke te raak en 'n sak met geskenkies te oorhandig.
Minister Simmers het ook gedurende die besoek die vordering van bouwerk aan Louis Fourieweg inspekteer. Die minister het ook tyd afgestaan om die eerste goedgekeurde huiseienaars te ontmoet, wat binnekort in die eerste huisfinansierings-afdeling van die Mountain View-behuisingskompleks intrek.