Dugmore se stappe
Daar sal voortgegaan word met die stigting van 'n niewinsgewende maatskappy ten einde die effektiewe bestuur en finansiële volhoubaarheid van Benevolent Park te verseker. So sê die Mosselbaaimunisipaliteit in 'n verklaring.
"Na afloop van ‘n dringende mosie deur die DA gedurende November 2023 het ‘n omvattende publieke deelname proses gevolg wat besprekings met die plaaslike verteenwoordiger van die Departement van Sosiale Ontwikkeling ingesluit het," lui die verklaring.
Die munisipaliteit sê voorts gedurende die raadsvergadering in Maart is besluit dat voortgegaan word met die stigting van ‘n niewinsgewende maatskappy. Nie al die opposie-partye was egter ten gunste van die besluit nie.
Intussen het Wes-Kaapse provinsiale parlementslid van die ANC, Cameron Dugmore, Dinsdag dié instansie besoek.
Raadsvergadering
Gedurende die vergadering waarna Dugmore verwys het, is 'n mosie van wantroue in die voormalige bestuur gestel. Dit het gelei tot 'n ondertekende petisie asook die nominasie én verkiesing van 'n nuwe bestuur gedurende dieselfde vergadering.
Twee van dié lede het sedertdien bedank, insluitende die voorsitter, William Sam. 'n Sakeman van Mosselbaai, Herman Strydom, het daarna as voorsitter oorgeneem.
Dugmore sê 'n dokument wat die tehuis se probleme uiteensit, is op 4 Maart aan die departement van sosiale ontwikkeling gestuur, maar daar is nog geen verdere aksie van die departement in werking gestel nie.
"Wat by die vergadering gebeur het, was niks anders as 'n kaping nie. Daar is 'n grondwet van Benevolent Park en die grondwet maak dit baie duidelik wat tydens 'n jaarvergadering moet gebeur. Daar was 'n mosie van wantroue in die bestuur voor die algemene verslag gegee is.
Wat tydens die vergadering gebeur het, is 'n groot probleem wat openlik aangespreek behoort te word."
Dugmore het gesê dit bekommer hom dat daar steeds geen aksie in plek gestel is om die probleme by die tehuis op te los nie.
Dugmore het gesê hy gaan drie stappe neem. "As lid van die parlement is dit my plig om te probeer om 'n oplossing te kry."
Hy gaan vir die nasionale minister van sosiale ontwikkeling, Lindiwe Zulu, skryf en vra dat sy die situasie by die tehuis moet ondersoek. "In terme van wetgewing het sy 'n algehele verantwoordelikheid teenoor bejaarde inwoners."
Tweedens gaan Dugmore vra dat daar 'n ondersoek moet wees in terme van wat by die algemene jaarvergadering in Augustus 2023 gebeur het en of die grondwet gevolg is. "Ek gaan versoek dat die minister 'n mediator aanstel om met alle betrokke partye te praat."
Dugmore sê hy gaan ook 'n versoek rig aan Sharna Fernandez, Wes-Kaapse LUR vir maatskaplike ontwikkeling, om te vra hoekom daar nog nie opgetree is in terme van die versoek wat op 4 Maart aan die departement gerig is nie.
Hy sê hy gaan ook die openbare beskermer vra om spesifiek die rol van die Mosselbaai-munisipaliteit in terme van Benevolent Park te ondersoek.
"Daar is groot vrae oor die huurooreenkoms. Ons moet die instansie verdedig en in belang van die bejaardes optree. Dit is belangrik dat almal moet weet wat aangaan en dat daar nie geheime of onsekerhede is nie."
Dugmore het gesê hy gaan drie stappe neem.