Opedag vir hokkiespelers
Ná Mary Smithers vir 11 jaar hokkie afgerig het by Potchefstroom Girls High in Noordwes, het sy besluit om haar passie en kennis van die spel ook met plaaslike spelers te deel. 'n Opedag word vir Vrydag, 26 April, by Laerskool Hartenbos beplan waar sy haar kennis met leerders tussen grade R en 7 sal deel.
Smithers is die eienaar van Tutorica Hokkie Akademie en nooi enigiemand wat hul hokkievaardighede wil opskerp, om dié gratis demonst0rasie by te woon. Die sessie sal plaasvind tussen 14:00 en 15:00.
Smithers was onderwyser by Potchefstroom Girls High en het self op hoërskool provinsiale kleure verwerf.
Tutorica het nog 'n talentvolle afrigter, Melinke Jansen van Vuuren, wat hoofsaaklik die kursusse gaan aanbied. Jansen van Vuuren koester 'n diep liefde vir die spel. Sy is baie passievol oor die sport. "Ek sien daarna uit om my liefde vir hokkie met jong kinders te deel en hulle waardevolle vaardighede aan te leer," se Jansen van Vuuren.
Jansen van Vuuren speel hokkie sedert Graad 1 en het haar skool verteenwoordig in die verskillende ouderdomsgroepe se A-spanne vanaf Gr 1 tot Gr 10. In haar Graad 11 en 12 jare, het sy vir haar skool se eerste span gespeel.
Een van haar groot prestasies was dat sy Gauteng verteenwoordig het op D12vlak op Laer- en Hoërskool.
In 2023 het sy hokkie afgerig by Laerskool Denneoord in George. Sy het gedien as afrigter en skeidsregter. Sy voltooi ook die komende naweek haar SAHA Vlak 1 hokkie-afrigtingskursus.
Jansen van Vuuren het die volgende gesegde oor hokkiespelers: "Hokkiespelers het vuur in hul harte en vasberadenheid in hul are".
Die Tutorica Hokkie Akademie begin amptelik op 30 April op Dinsdae, Donderdae en Vrydae, en die afrigtingsessie sal by Laerskool Hartenbos plaasvind.