Voëlvlei VLV vier 90 jaar met koek-kunswerke
Die Voëlvlei VLV-tak is amptelik in 1934 gestig, en vier vanjaar sy 90ste bestaansjaar.
Op 23 April het 31 entoesiastiese lede en vyf ewe entoesiastiese oud-lede van VLV Voëlvlei op Vleesbaai bymekaargekom om dié groot mylpaal met ‘n oggendtee te vier.
Getooi vir die geleentheid, elk met ‘n unieke hoed, het die vroue aangesit by pragtig versierde tafels. Laetitia Lombaard se wenhoed was versier met 2 meter materiaal en die rose van haar skoonsus se kleindogter se troue. Dié het baie komplimente ontlok.
Vyf besondere verjaardagkoeke het gesorg vir verdere opheldering van die dag. Die vroue het baie moeite gedoen met hul koek-kunswerke. Linzetta Smit se verjaardagkoek het met die louere weggestap. Dié kunswerke is met groot smaak geniet gedurende die kuier om die teetafels.
Klub-geskiedenis
Annamarie van die Merwe het die vroue op ‘n besondere wyse ingelig oor die ontstaan en geskiedenis van Voëlvlei se VLVtak. Hoewel die tak amptelik in 1934 gestig is, is daar reeds vanaf 1930 informele en ongereelde vrouebyeenkomste gehou. Daar was ‘n behoefte by die boere se vroue om hul deel by te dra ten opsigte van volwasse opvoeding.
Johanna Pienaar het die bal aan die rol gesit. Twintig vroue van Voëlvlei en omliggende plase het bymekaargekom op die plaas van Pollie Pienaar. JJ Scholtz en Dora Robertson, voorsitter van SWD, het die tak amptelik gestig. Johanna Pienaar is as die eerste voorsitter gekies en Lena
Honiball as sekretaresse.
Vergaderings is aanvanklik by lede se huise gehou (saam met die Voëlvlei Boerevereniging), maar namate die ledetal gestyg het, moes die byeenkomste skuif na ‘n klaskamer in Laerskool Buffelsfontein. Vandaar na die gholfklub op Boggomsbaai en huidiglik word die vergaderings om die beurt in Vleesbaai en Gouritsmond gehou.
Oor die jare is interessante en leersame demonstrasies en praatjies aangebied en afgevaardigdes is na konferensies en kongresse gestuur. Kompetisie-pryswenners vanaf daardie tyd, wie se name gereeld voorgekom het, is Margaret van Rensburg, Connie Terblanche, Elize Pienaar, Johlene Muller en Linzetta Smit.
"Ons het hulde gebring aan al die getroue lede wat oor die 90 vrugbare jare bygedra het om VLV Voëlvlei se naam hoog te hou met elkeen se talentvolle insette op vele terreine," sê Elize Locke, voorsitter van die Voëlvlei VLV-tak.