Geen rus by begraafplaas
Die omgewing is deel van die dorp se erfenis en is volgens ‘n inwoner nou egter ‘n slaapplek vir haweloses.
'n Inwoner van die Beacon Point woonstelkompleks het genoeg gehad van wat hy noem "die voortslepende verval van die begraafplaas" by Die Punt op Mosselbaai. Jannie Slabber woon reeds 20 jaar in die gebied en het besluit om fondse in te samel vir twee fietse sodat die begraafplaas daagliks gepatrolleer kan word.
Erfenis
Slabber sê die omgewing is deel van die dorp se erfenis en is volgens hom nou egter 'n slaapplek vir haweloses.
"Die gebied word as toilet gebruik en krane word oopgelos met water wat uitloop."
Tydens die Mossel Bay Advertiser se besoek aan die begraafplaas die afgelope week was die gras tussen die grafte lank, 'n hawelose het homself daar tuisgemaak en daar was rommel en ontlasting teen die muur. Slabber sê die begraafplaas is 'n gewilde besoekgebied vir toeriste en vorm ook deel van begeleide toere in die dorp.
Hy beplan om die geld in te samel en dan aan die Mosselbaaimunisipaliteit te oorhandig vir die aankoop van twee fietse wat deur die Mosselbaai Sentrale Verbeterings Distrik se personeel gebruik kan word.
Die Advertiser het navrae aan die munisipaliteit oor die kwessie gerig.
Kontrakteur
Die munisipaliteit het ‘n kontrakteur wat volgens kontrak maandeliks gras by begraafplase behoort te sny.
"Die relevante afdeling is reeds bewus van die lang gras en is besig met prosedures om dit aan te spreek. Wanneer hawelose mense egter opgemerk word, moet dit dadelik aan wetstoepassing deurgegee word by 044 606 5000, sodat die begraafplaas ingesluit kan word by hul daaglikse roetes. Dit is dan ook intussen onder wetstoepassing se aandag gebring."
Die begraafplaas het grafstene wat uit 1809 dateer en is 'n erfenisterrein. Geen grafte is sedert 1 Oktober 1996 op die perseel toegelaat nie.