BAZIZWA BEYINGXENYE YOMKHANDLU
UMKHANDLU nayinoma ngumuphi aweziwe yizindonga nje kuphela kepha wenziwe nangokunye okwehlukile. Amakhansela naqokelwe ukuhola nokushaya imithetho ayingxenye kanjalo nezisebenzi ezilekelela ukwelusa lokho okuyizinqumo nezinhlelo zoMkhandlu. Nokho bakhona abanye abantu ongathi uma unganakile ungabafaki ohlwini lwabantu abayizithako ezenza uMkhandlu usebenze. UMsunduzi News ukhulume nabanye balaba.
UNkk uCynthia Mnyandu kanye noNkk uKhonephi Zindela bayaziqhenya ngokuba yingxenye yoMsunduzi futhi bazibona beyikhonco elimqoka. Umsebenzi wabo wansuku zonke uhlanganisa ukuhlinzekela hhayi kuphela amakhansela kepha nabavela ngaphandle abasuke benemihlangano eHhovisini leMeya. Uma sebekhwishizela benza into yabo kuyabonakala ngoba akekho okhala ngephango noma ngenxano.
UNkk uMnyandu uchaze ikhishi abasebenzela kulona njengelincane kodwa elakha enkulu injabulo. “Lo msebenzi wasekhishini ngiwuthanda kakhulu ngoba njengoba ngingumama ngiwenza ngothando futhi uhlezi ungivumela ukuthi ngibe umama noma inini ngoba njalo mangenze ukudla ngikwenza ngothando engathi ngenzela izingane zami,” kusho uNkk uMnyandu.
Uthe akukho zingqinamba abahlangabezana nazo kuphela nje uke azizwe sengathi ube nomona uma kukhona okuphelile engakutholanga ngesikhathi kusanomhlangano sekumele abanikeze. “Njengoba namanje amanzi engekho sekungathi nginephutha mina enhliziyweni yami ngoba ngikhuliswe ekhaya kuthiwa umuntu akaphumi ekhaya engadlile, ngizizwa ngincishana nje,” kusho uNkk uMnyandu emamatheka.
Ebuzwa ukuthi ngosuku wenzani, uthe cishe ngosuku bahlinzekela abantu abangama-20, kuthi uma kunomhlangano woMkhandlu isibalo senyuke ema-60 kweve.
UNkk uMnyandu uthe njengoba engumuntu ohamba ngenduku nje uMkhandlu wamenzela lukhulu njengoba esebenza ngenqola alayisha kuyona. “Hhawu ngivele ngizizwe ngisehhotela uma sekumele ngihambise iziphuzo nokudla ngoba kukhona inqola neyenza umsebenzi kubantu,” kuchaza uNkk uMnyandu.
UNkk uZindela utuse impatho kumqashi nathe yenza kube lula ukwenza umsebenzi wakhe. “UNkk u-Evodia Mahlangu, uMnu uThobani Zuma onguSekela Sodolobha kanye noSodolobha uqobo uMnu uNjilo ngabaphathi bami.
Bangiphethe kahle kakhulu noma ngisebenza bangisebenzisa kamnandi bayangiyekela ukuthi ngenze umsebenzi wami ngendlela,” kuncoma uNkk uZindela.
Echaza ngomsebenzi wakhe umsebenzi wakhe ukuthi lithi ligamenxe ihora lesi-7 abe esewahlanzile amahhovisi abaphathi bakhe. Uveze ukuthi into ayithandayo ngomsebenzi ukuthi vele ungumuntu othanda indawo ehlanzekile nokwenza kubelula ukuthakasela umsebenzi wakhe.
Lezi ngezinye zezisebenzi zoMkhandlu eziqashelwe ukuthi phakathi kokunye ukusebenza koMkhandlu kube lula, khona lapho nokuqinisekisa ukuthi izivakashi eCity Hall zizizwa zamukelekile.