Nakulokhu iNhlokodolobha ingusokhaya ofanele
NGOKUSEMTHETHWENI siguqile iSishayamthetho Sesihlanu njengoba kuyiwa okhethweni. Lo ngunyaka owehlukile kupolitiki yakuleli. Ngunyaka wokhetho lapho izakhamuzi zizothola ithuba lokuyokhetha uHulumeni nabaholi ezibathandayo.
Kube yilesi sizathu esenze ukuvulwa nokuphinde kuguqe iSishayamthetho Sesihlanu kube nesasasa.
Njengokwejwayelekile lo mcimbi ube yizinsuku ezimbili, olokuqala kube yiSILO nesethule inkulumo abaningi abayihumushe ngokuthi ibinesigqi futhi iwufanele umcimbi.
Ngosuku lwesibili kube yinkulumongqangi kaNdunankulu uMacingwane naye oneke konke obala; ubeka okube yizingqinamba, okube yimpumelelo kanye namasu okuya phambili.
Lona bekungumcimbi ombalabala, abantu abavela emikhakheni eyahlukene. Usokhaya okuyiMeya ikhansela uThemba Njilo utuse ukusebenzisana kwenzinhlaka zonke zikaHulumeni ekwenzeni lo msebenzi ube yimpumelelo.
“Lezi zinsuku zombili zibe yimpumelelo njengoba umsebenzi wonke ube sezingeni eliwufanele, kusuka ngesikhathi OMdala ethula inkulumo yakhe kanjalo nakuNdunankulu wethu okuthe noma ehlaselwa wukugula kepha uNkulunkulu waba nomusa kwedlula,” kusho iMeya.
Inanela ngengqikithi yenkulumo yeSILO noNdunankulu obekuyintuthuko yasemakhaya, ezolimo nokuthuthukiswa komnotho kanye nokudalwa kwamathuba emisebenzi, iMeya ithe uMsunduzi uwubufakazi bakho konke obekukhulunywa.
Ephawula ngodaba lokuthuthukiswa komnotho wendawo uveze uvumile ukuthi ukwentuleka kwamathuba emisebenzi kuyinkinga kuzwelonke.
“Njengomnikelo ekulweni nalesi simo singuMasipalala sikhethe uhlelo lomasimambisane ngoba sikubona njengohlelo olungcono njengoba luqinisekisa ukuthi umnotho usabalala kuwo wonke umuntu,” kubeka iMeya.
Ube eseveza nokuthi ekusebenzeni kwawo uMasipala usebenza nezinye izinhlaka zikaHulumeni wenza isibonelo ngomhlangano wakamuva wokucobelelana
ngolwazi nobuhanjelwe nguNgqongqoshe woMnyango Wezamabhizinisi Amancane uMhlonishwa uLindiwe Zulu.
UMasipala uMsunduzi uyakwenamela ukukhula komnotho kusukela waba nguwona wodwa okuhlala khona iSishayamthetho. Kubikwa ukuthi ukhule ngamaphesenti angama-30 ngonyakamali wezi-2003/2004 futhi ulokhu ukhuphuka ngokuzinzile.
Ukuba khona kweSishayamthetho eMsunduzi kanjalo nokuvulwa kwaso minyaka yonke kunomthelela omuhle emnothweni wendawo ngoba njalo uma sihleli kuba khona isidingo sendawo yokulala. Kanjalo nokuba khona kwamahhovisi amakhulu eminyango eyehlukene kwenza bande abantu abahlala kuleli dolobha namaphethelo kwazise amakhulu ezisebenzi zifuna indawo yokuhlala.
Konke lokhu kudala ingcindezi kuMasipala ekutheni uqhamuke nezinhlelo zokuththukisa idolobha ikakhukukazi ingqalasizinda.
Kulokhu uNjilo uthe nakanjani phezu kwezingqinamba uMkhandlu unezinhlelo ezahlukene zokwenza uMsunduzi ukuba uqhubeke nokufaneleka ekubeni yiNhlokodolobha.