Izinhlelo zokuphephisa izisebenzi nomphakathi
UKUBHEDUKA kokhuvethe kuholele ekutheni kuphakame amaphaphu kuzakhamuzi zaseNingizimu Afrika. IMeya yanxusa izakhamuzi ukuthi zehlise amaphaphu khona kungeke kube nokuxhamazela nakulabo abasebenzayo ikakhulukazi abasebenza ngomphakathi. UMasipala usuwenze izinguquko ukuze ungabeki engcupheni izimpilo zalabo abasebenza ngomphakathi.
Isigungu esiphezulu soMkhandlu sibize umhlangano ophuthumayo wokudingida okumele bakwenze njengoMkhandlu ukuvikela izakhamuzi zaseMsunduzi. IBamba leMeneja, uNkk uNelisiwe Ngcobo, lithe bakubone kumqoka ukuthi baxhumane kahle nomphakathi.
ISikhulu sehhohivisi leMeneja, uNks uMedelien Jackson, senze izethulo esigungwini zabazokwenza ukuzama ukunqanda ukubhebhetheka kwaleli gciwane kulandela inkulumo yesakhamuzi sokuqala eNingizimu Afrika uMengameli uCyril Ramaphosa. “Njengoba uMengameli ethe akumele kuhlangane abantu badlule e-100 sizohlehlisa imicimbi ebesesiyihlelile, ngenhloso yokuxhumana nomphakathi, siphinde sigweme umhlangano woMkhandlu ngoba uba nabantu abangaphezu kwe-100 uma sekuhlangene amakhansela, izisebenzi kanye nabezindaba.” kusho uNks uJackson.
Izindawo zomphakathi ezilawulwa uMasipala njengamahholo ngeke zivuleleke emphakathini nalabo abese bebefake izicelo zizohoxiswa, amapaki kanye nezindawo zokubhukuda zizovalwa. Izindawo ezimqoka zikaMasipala okungamele zivalwe kunohlelo lokuhlinzekwa ngezibulalimagciwane. Ukusayinwa kwamarejista kuzogwenywa lapho kumqoka umuntu kuzomele asebenzise ipeni lakhe.
Indawo lapho kuthathwa khona izincwadi zamakhansela (proof of residence) kunxuswa umphakathi ukuthi usebenzise amahhovisi amakhansela asemawadini ukugwema ukuthi azithole eseyizisulu zalolu bhubhane. Kanjalo nokusetshenziswa kwemitapo yolwazi kunqunywe ukuthi kuzolawulwa ngendlela ethize ukuze kuncishiswe isibalo sabantu abambondelene ndawonye.
Izisebenzi zophiko i-Occupational Health zizohambela amarenki kanye namakhaya abadala ukuhlinzeka ngezibulalimagciwane, kuphindwe kuqeqeshwe namakhansela ukuze adlulisele ulwazi emphakathini.
UNkk uNelisiwe Ngcobo uthe usethinte uMnyango Wezezimali ukuba ubanike imvumo yokuthi basebenzise imali ukuthenga lokho obekungekho kusabelomali ukuze bazame ukulwisana nokhuvethe.
UMlawuli woMkhandlu uMnu uScelo Duma ephawula ngokuhlehliswa kwemcimbi uthe: “Izimbizo aziwuphoqeleli uMasipala ukuthi zibe khona, ukuba khona kwazo kuhle ngoba uMasipala uthola ithuba lokukhuluma nomphakathi uphinde wenze izethulo kodwa kuzomele kusetshenziswe amaphepha ukuxhumana nomphakathi, lokho nomthetho uyakuvumela kokulawulwa koMaspala.”
Uqhube ngokuthi iMeneja ayinawo amandla okukhipha umyalelo wokuthi kuthengwe izinto ngokushesha, kuzomele iMeya isebenzise amandla ayo ukwenza ukuthi asebenzise imali engafakiwe kusabelomali.
IMeya uMzimkhulu Thebolla ithe: “Engikubona kumqoka ukuthi singagxambukeli emsebenzini woMnyango Wezempilo, okumqoka ukuthi siqinisekise ukuthi abazophelelwa amanzi esibhedlela esihlonzwe njengelaso esizobhekana nokhuvethe.”
Ithe kuzomele kwenziwe isiqiniseko sokuthi izinsiza ziyafinyelela emphakathini.
“Okumqoka ukuthi siphinde sivikele izisebenzi zethu singabeki impilo yazo engcupheni yokuthi bazithole sebehaqwa ileli gciwane,” kuphetha iMeya.