Izisebenzi nelukuluku lokubuyela ensimini
Ezinye izisebenzi zilokhu zagcina emsebenzini zingama-26 kuNdasa ngesikhathi uMengameli uCyril Ramaphosa ememezela ukuthi kuzovalwa izwe ngenxa yokhuvethe. Ngokuqhubeka kokuvalwa kwezwe wamemezela ukuthi izwe lizolokhu livulwa imikhakha ethize ukuze kulawuleke ukubhebhetheka kwalesi sifo.
Ezinye zezisebenzi ziyakuthakasela ukuthi zihola zingasebenzanga ikakhulukazi lezo ezaziyo ukuthi zisebenza ngokugcwele kuphela zilinde imyalelo kaMengameli ukuthi zibuye, nokho akusizo zonke njengoba ezinye sezinqume ukufinqa imikhono zayolungisa lapho zisebenza khona ukuze zizame ukugcina izindawo zazo zihlanzekile futhi ziziqhenya ngazo.
INduna, uMnu uNavesen Pillay, eqaphe indawo yokubhukuda i-Olympic Swimming Pool yena neqembu lakhe okunguMnu Delani Mbanjwa, uMnu uSibusiso Sigudo, uNks uBernadine Ranjeeth noNks u-Algene Jenneker sebenze izinhlelo zokuthi bayigcine ihlanzekile le ndawo. UMbanjwa osebenza kule ndawo uthe: “Sifake ingcindezi kubaphathi ngoba indawo yethu siyayithanda, ukuhlala kwethu emakhaya kuyasigqilaza ngoba vele sizothi sibuya nomsebenzi usumkhulu ekugcineni umsebenzi odinga thina.”
Uqhube ngokuthi ayikho inzuzo yokuhlala ekhaya kuyakhathaza ngoba imsebenzi ababebona ukuthi kumele bayenze emakhaya sebaqeda ngayo akusekho abasakubona bekuhlalele khona. Ngenkathi lifika leli phephandaba lithole uMbanjwa esika utshani esebenzisa umshini, esexoxa uthe: “Ngokomthetho ukunquma utshani akusiwo umsebenzi wami kepha ngeke ngilinde abantu engingazi ukuthi bayofika nini ngibe ngazi ukuthi ngiyakwazi ukwenza lo msebenzi.” Uthe lokhu abakwenzayo abakwenzi ngobumpimpi into abayikhuluma beyizisebenzi ukuthi bacele ukubuyela.
UPillay osesebenze iminyaka emibili njenge nduna kule ndawo enomlando omuhle ekulawulweni kwezindawo zokubhukuda njengoba eqale eWoodlands waya e-Alexandra nakuBuckanen Street uthe: “Ngiqale ukuba nothando lwale ndawo eminyakeni emibili eyedlule lapho sengisebenzisa nemali yami ngoba ngibona ukuthi kunezinto okungathi ziyalimala. Ilapho engabona khona ukuthi kumele ngithinte abantu abathize balungise ukubiya, izimbobo esangweni siphinde silungise iPaddling Pool kanye namalambu ukuze kukhanye kubukeke kahle.”
Uqhube wathi njengoba kungakashiwo ngokusemthethweni ukuthi ababuye, ubone kusemqoka ukuthi kube yibo abazozitholela izivikeli okuyizimfonyo, izibulalimagciwane kanye namagilavu.
“Lezi zinto zinikelwe inkampani kankosikazi wami iPlatnum Sergical,” kusho yena.
Uthe esikhathini esingangenyanga esedlule uthe edlula ngendlela wabona ukuthi isithunzi sabo sizodicileleka phansi esebona kugcwele ukhula. “Ngakhuluma nomphathi wami uMnu uMandla Zuma ukuthi singakwazi yini ukuthi okungenani singene amaviki amabili, ngamazisa ukuthi nginazo izivikeli ukuze siphephe, wahlola ukuthi kukulungele yini futhi yizo lezi ezidingekayo wabe esevuma,” kusho uPillay.
Uthi usesebenzise imali engangezi-R16 000 ephuma ephaketheni lakhe ukulungisa le ndawo asebenza kuyona. “Ngiyazi ukuthi ngingangaba namandla okuhambisa ukudla umuzi nomuzi kepha lokhu engikwenzayo kuwukubuyisela emphakathini.”
UPillay uthenge nomshini wokusika utshani kule ndawo ayiqaphile.
“Nginqume ukuthenga umshini ngoba bengibona izisebenzi zigqilazeka uma ngithi ngilinde umshini kubaphathi. Ngabona kungcono ukuthi ngiwuthenge khona bezokwazi ukusebenza lapho bebona kungcono ukuthi basebenze khona bangalawulwa ukushoda kwezinsiza kusebenza,” kusho yena.
Uqhube ngokuthi bazokwenza konke okumele bakwenze ukuze bagcine le ndawo ihlanzekile, into abangeke bayenze kuze kushiwo ukuthi bavula nini ukukhipha amanzi endaweni yokubhukuda. “Ngeke sikwazi ukuthi sikhiphe amanzi okwamanje ngoba kungafana nokuthi sithela amanzi emhlane wedada, uma ufaka amanzi kumele anakekelwe kanti uma siwafaka sizophinda siwakhiphe uma sekuvuliwe lokhu kuzobe kusho ukuthi simosha amanzi. Sisazoqhubeka kodwa sihlanze konke okunye,” kusho yena.
Uphethe ngokubonga izisebenzi wathi selokhu asebenza nazo imnyaka emibili azikaze zikhononde ngalutho. Uthe baliqembu elikulungele ukusebenza. Ezinye izisebenzi zisabile ukukhuluma nentatheli yephephandaba.