Sesilungele ukusebenza isikhumulo i-Oribi
NGOKUYA kuxegiswa kancane kancane ukuvalwa kwezwe ngezigaba uMengameli wezwe, uMnu uCyril Ramaphosa, wamemezela ukuthi mhla lulunye kuNtulikazi kunezikhumulo zezindiza ezizovulwa kodwa zizobe zisetshenziswa yilabo abahamba ngokwebhizinisi.
Isikhumulo sezindiza saseMsunduzi, i-Oribi Airport, sibe phakathi kwezikhumulo eziyisi-7 okumenyezelwe ukuthi ziqale ukusebenza.
IMeneja yalesi sikhumulo, uNks uNontobeko Mofokeng, ilandise leli phephandaba ngezinhlelo abanazo ukuqala ukusebenza njengoba kungasasetshenzwa ngendlela eyejwayelekile. UNks wakwaMofokeng uthe: “Sesikulungele ukusebenza isikhumulo sethu sezindiza. Emva kokuba sesithole umyalelo wokuthi sesingasebenza isikhumulo sezindiza sesisihlanze ngezibulalimagciwane okwesine kusukela kwaqala isigaba sesithathu semvalelwakhaya ngoba izikole zokufundisa ukushayela izindiza zanikwa imvume ukuthi sezingaqala ukufundisa ngesikhathi kuqala lesi sigaba. Ngakho-ke lesi sikhumulo besisetshenziswa yilaba abafundayo kuphela besingakavuleleki emphakathini.”
Uqhube ngokuthi ngaphambi kokuba umuntu angene esakhiweni sesikhumulo uyahlolwa okuhlanganisa namazinga okushisa bese ehlanzwa izandla ngesibulalimagciwane. “Uma amazinga okushisa engaphezulu kwama-37,50C sizonikeza umuntu ithuba lokuthi athi ukuphola imizuzu ephakathi kwemihlanu kuya kweli-10, uma ingehli sizophoqeleka ukuthi singakwazi ukumvumela ukuba angene ngaphakathi kwesakhiwo,” kusho uNks uMofokeng.
Mayelana nokuphepha kwezisebenzi uthe zivikelwe ngemipheme ezihlukanisa nabantu ezibasizayo esikhumulweni, ngamashield mask ukuqinisekisa ukuthi abatheleleki ngokhuvethe. “Senze isiqiniseko sokuthi kuzo zonke izindawo zethu zinezibulalimagciwane ikakhulukazi lezo ezithintwa ngezandla njalo,” kusho yena. Ngesikathi leli phephandaba lifika kulesi sikhumulo lithole uNks uMofokeng ezibambele mathupha enza omaka phansi athe lokhu ukwenzela ukuqinisekisa ukuthi labo abasebenzisa lesi sikhumulo bayawuhlonipha umgomo wokuqhelelana kwabantu ngegebe okungenani eliyimitha elilodwa.
Kulesi sikhumulo izindiza ziqale ukusebenza mhla ziyisi-6 kuNtulikazi.
UNks wakwaMofokeng uthe uma beqala ukusebenza bazoqala ngezindiza zasekuseni nantambama, ezasemini ngeke zibe khona.
“Izindiza ezikhona ezisuka lapha (Msunduzi) ziya e-OR Tambo International Airport. Lezi ezinabaninizo yizona esibona zizoba matasa kakhulu ngoba ziya noma ikuphi kuleli lizwe,” usho kanje.
Uqhube ngokuthi unxusa abagibeli ukuthi bathole imininingwane yezindiza ku-inthanethi ukugwena ukugcwala esikhumulweni futhi bangabambi imigqa noma baxhumane nezisebenzi zakulesi sikhumulo. “Sinxusa izakhamuzi ukuthi izincwadi zazo ezibagunyaza ukuthi zingahamba zizithumele ngaphambi kokubekisa izindiza. Esikhumulweni kuvumeleke labo abahambayo kuphela, abaphelezele kanye nabazohlangabeza abasavumelekile ngoba sinciphisa isibalo sabantu abasebenzisa isikhumulo. Nabagibeli abavumelekile ukuthi bangene esakhiweni nokugibela izindiza bengazifakile izimfonyo,” kusho yena.
Uthe ngaphambi kokuba abagibeli bangene endizeni bazohlolwa ukushisa futhi.
“Uma kutholakala ukuthi umgibeli unamazinga aphezulu okushisa uzonikezwa isikhathi sokuphola ngoba kungenzeka ukuthi kukhona okumcasulile mhlawumpe kwanyuka amazinga akhe okushisa, uma kuwukuthi awehli ngeke sikwazi ukumfaka endizeni, uzophoqeleka ukuthi ajike ayofuna usizo lwezempilo.”
Uthe yingakho benxusa abagibeli ukuthi bafike kusanesikhathi okungenani esingangehora ukuze bakwazi ukwenza kahle izinto okumele zenzeke bangaze bashiywe yizindiza ngoba umuntu efike emva kwesikhathi. Uqhube ngokuthi abezokuphepha bazobheka izimpahla baphinde baqinisekise ukuqhelelana kwabantu.
“Kwelulekwa abagibeli ukuthi bakhumule yonke into ezokwenza ukuthi umshini ohlola izikhali ukhale ngisho ubucwebe, ibhande kanjalo nemali ewuhlweza. Uma umshini uqhubeka ukhala uzonxuswa ukuphindela emuva, ukhiphe lokhu okukhohliwe, uma kuqhubeka onogada bazosebenzisa umshini ozwa insimbi uma kwedlula lapho bazophoqeleka ukuthi basebenzise izandla,” kusho uNks wakwaMofokeng.
Uqhube wathi kulabo abakhonze ukuhamba nezilwane akuvumelekile kodwa kuvunyelwa kuphela labo abahamba ngebhizinisi. “Isikhumulo sethu sisetshenziswa kakhulu izingane zesikole okungezona ezaseMsunduzi ngakho zizothola incwadi evela esikoleni ezosetshenziswa.”
Uphethe ngokuthi izibulalimagciwane zizobe zikhona ngaphambi kokungena lapho kuma khona izimoto kanti nezinqola zemphahla nazo zizohlanzwa.
IMeneja yesifunda enkampanini i-Airlink, uMnu uShameel Deeplaul, ithe: “Isizathu esenza ukuthi siqale mhla ziyisi-6 kule nyanga ukuthi siyinkampani asifunanga ukuxhamazela ngoba nakhu sesithole igunya lokusebenza kepha kumele silandele yonke imigomo singathathi izindlela ezisheshayo okungagcina kubeke abagibeli engcupheni.”
Lesi sikhumulo sinenkampani eyodwa yezindiza okuyi-Airlink.