Selukhona uhlelo lokukhuculula imijondolo
NGOKWEZIBALO zoMnyango Wezokuhlaliswa Kwabantu esifundazweni KwaZulu-Natal, imijondolo isiyonke ingama-269 337 kanti isifunda esinesibalo esiphezulu i-EThekwini ngama-208 434, kulandele uMgungundlovu onezakhiwo zemijondolo engama-39 394.
Njengegxathu lokulwa nokusabalala kokhuvethe, uMnyango Wezemvelo kanye noKuthuthukiswa Kwezindawo Zasemakhaya ususebenzisane noWezokuhlaliswa Kwabantu ukuletha ochwepheshe abazokwenza kubelula ukuhlanza izindawo zabantu ikakhulukazi imijondolo.
Le minyango isebenza noMasipala wesiFunda uMgungundlovu kanye noMasipala basekhaya. IMeya kaMasipala wesiFunda uMgungundlovu uNkk uThobekile Maphumulo ithe: “Izindawo esizihlonzile ukuthi kuqalwe ngazo ukukhucululwa ikwaJika Joe, iseSacca kanye naseMerrivale ngoba izona ezinemikhukhu eminingi, asifisi ukuthi abantu bathelelane ngaleli gciwane.” Iqhube yathi okusemqoka ukuthi izakhamuzi zizijwayeze ukugeza izandla bese ziphinda zilandela imiyalelo ekhishwa uHulumeni ikakhulukazi uMnyango Wezempilo.
UMnu uThokozani Magagula woMnyango Wezokuhlaliswa Kwabantu uthe: “UMnyango uhlinzeke izakhamuzi ngamaqhuzu ensipho, sahlanza ngezibulalimagciwane imijondolo. UMasipala uMsunduzi ube usufaka amathangi amanzi ukuze angabapheleli futhi bawakhe eduzane ngoba amanzi awumgogodla wenhlanzeko.”
Uthe imikhukhu engama-3000 kwaJika Joe ihlinzekwe ngensipho, eSacca kwaba engama-4000 kwathi eMerrivale engama-250. Ekhuluma naleli phephandaba uMagagula uthe, ubukhulu bamijondolo yakwaJika Joe ngamahektha ayisi-7 lapho basebenzisa amalitha angama-581 esibulalimagciwane kanye nensipho eyizi-6000. ESacca ngamahekta ali-10 basebenzisa amalitha angama-880 esibulalimagciwane kanye nensipho eyizi-8000, eMarrivale ali-124,5 amalitha kanti bahlinzeke ngensipho engama-500.
“Imali esetshenzisiwe ukulekelela lezi zindawo izi-R201 000,” kusho uMagagula.
Echaza ngokuthi asinabo yini ubungozi noma ubuthi lesi sibulalimagciwane abasisebenzisayo uthe: “Izisebenzi zethu ngaphambi kokuthi zingene emizini yabantu ziqala zifundise okumqoka ukuthi izakhamuzi zithathe imizuzu emihlanu uma sekufuthiwe ngaphambi kokuba zingene endlini.”
Ikhansela le-Inkatha Freedom Party (IFP) eMsunduzi uMnu uDennis Ntombela lithe: “Lesi sifo sibiza ukuthi thina baholi sibumbane senze lokho okulindeleke kuthina, simele labo esibaholayo, sibeke eceleni ipolitiki yamaqembu, sisindize impilo yabantu bakaNkulunkulu. Iqembu lethu lisebenza ngokubambisana noHulumeni, uzokhumbula ukuthi nathi siyiIFP sithe saphonsa esikhwameni iSolidarity Fund ukuze kuzohlengeka izimpilo zabantu.”
Ikhansela laseSacca uNks uSandra Lyne lithe: “Kunzima ukuthuthukisa indawo yaseSacca ngoba noma engabe uMasipala ufisa kanjani, inkinga ukuthi indawo engaphansi komuntu. Siyakuthakasela lokhu okwenziwa uHulumeni wesifundazwe ukuzama ukuhlenga izimpilo zabantu, inkinga ukuthi akukazeki ukuthi iyophela nini imijondolo eSacca ngoba siyabona uMasipala uyazama ukulwisana nayo njengoba nakwaJika Joe bakhelwa izindlu lapho bezohlala khona futhi ezinesithunzi.”
IMeya yoMsunduzi uMzimkhulu Thebolla ibonge igxathu elithathwe uHulumeni wesifundazwe nokuhlonzwa nguMasipala wesiFunda ukulekelela abantu bakulo Masipala ikakhulukazi labo abaxakekile. “Inhloso nesesifisa ukukuzuza ukuthi isibalo salabo abahaqwe yilesi sifo singanyuki, labo abangakasitholi bahlinzekwe ngezinsiza.”