Isabelomali nokuvikela izakhamuzi
Ngenxa yokhuvethe nonyaka isabelomali sethulwe ngendlela eyehlukile. Sigxile ekuhlinzekweni kwamanzi, ukuqoqwa kwemfucuza nezindlu
MINYAKA yonke uma kuqala unyaka omusha wezimali kulindeleka ukuthi iMeya yethule isabelomali kuzinkumbi zabantu. Kulokhu ngenxa yokhuvethe kuphoqeleke ukuthi imicimbi ebihleliwe ihlehliswe. Neyesabelomali ingeminye ebenalelo lishwa. Kodwa ngenxa yobumqoka bokuthi sibe khona isabelomali uMsunduzi unqume ukusebenzisa izinkundla zokuxhumana ukuze izakhamuzi zibeke indlebe, zizwe ukuthi kwabiwe kanjani.
Njengengxenye yeqhingasu lokuzuza izithameli eziningi zaseMsunduzi, amabhizinisi obumnandi iChilla Nathi, iSundace kanye neCookeirs Experience asebenzise izinkundla zawo zokuxhumana ezinabantu abaningi abalandela amakhasi abo ukuthi bathamele lesi sabelomali.
IMeya uMzimkhulu Thebolla ngesikhathi yethula isabelomali sezigidigidi ezi-R5,9 sonyaka wezi-2020/21, ithe kulo nyaka kuzobe kungowama-65 kwavunyelwa abantu ukuthi bazibandakanye noHulumeni kanjalo nakulokho abakufisayo (Freedom Charter), yathi ifisa abantu baqinisekise ukuthi izakhamuzi kumele zizizwe ziyizakhamuzi zakuleli. “Sizibophezele ekubeni uHulumeni wasekhaya othuthukayo, odala amathuba omsebenzi, oletha izinsiza emphakathini, othuthukisa izindawo lapho kuhlala khona abantu kanjalo nohlinzeka ngezindawo eziphephile,” kusho iMeya.
Iqhube ngokuthi ukhuvethe luphoqelele ukuthi bathathe izinqumo ngokushesha bengabaholi futhi ezinqala. Ithe lesi sikhathi akusona esokudlala ipolitiki engathi shu kepha isikhathi sobumbano ukuze kulekeleleke abampofu. IMeya ithe uHulumeni usanezingqinamba ukwelekelela kakhulu labo abangasibo omacaphuna kusale njengoba abanye ingqalasizinda ibavumela ukuthi bathenge nge-intanethi balethelwe izinto lapho behlala khona, kwabanye akwenzeki. “Kuyasithokozisa ukuthi isigaba sesi-3 sokuvalwa kwezwe siyawuvumela umnotho wedolobha ukuthi udlondlobale imbijana, lokhu kuzolekelela idolobha ukuthi lisebenzise amaqhingasu eliqhamuke nawo ukufukula umnotho,” kusho iMeya.
Ithe sebesebenza ngaphansi kwesiqubulo esithi “We are a City On the Move” esisho ukuthi balidolobha elenza okuthile futhi bayaphendula kulokho okuyizidingo zabantu, bangomabizwa asabele.
“Njengoba ngihola idolobha manje ngithanda ukubonga labo abangiqalela indlela oComrade uRob Haswell, uSimphiwe Gwala, u-Omar Latiff, uHloni Zondi, uZanele Hlatshwayo, uChris Ndlela kanjalo noThemba Njilo,” kusho iMeya itusa ezinye esezaphuma ezazihola lo Masipala.
IMeya ithe kuyiphathe kabuhlungu ukubona idolobha lingcolile. “Ngithanda ukuxolisa kulabo abalibone likulesiya simo. Izindaba ezimnandi ezokuthi uMasipala usuqashe isikhulu esiphezulu ophikweni lwakaWaste. Sesinamaqhingasu azokwenza ukulawulwa kwemfucuza kube sezingeni eliphakeme, sesizoqala ukubonakala emphakathini njengoba nemigomo yokuvalwa kwezwe seyithanda ukuthamba.”
Iqhube ngokuthi ukuqashwa kweMeneja yeDolobha uMnu uMadoda Khathide kwakuwukuqala kwesigaba esisha nokuletha uzinzo kuMasipala njengoba kunguye umuntu ozokwazi ukuthwala konke okwenzeka kulo Mkhandlu. “Siyaqhubeka nokugcwalisa izikhala zemisebenzi emqoka engenabo abantu abasebenza kuyo, kuyimanje sisezinhlelweni zokuqasha izikhulu ezimbili ze-Infrastructure kanye neCommunity Service.”
Ukulwisana nenkohlakalo iMeya ithe izona zinto eziseqhulwini kubo, ikakhulukazi ekubambeni nanoma isiphi isisebenzi sikaMasipala esenza ibhizinisi khona. Ithe bafuna ukulwa nalo mkhuba wamabhizinisi abiza kakhulu uma ezohlinzeka uMsunduzi ngezinsiza kanye nempahla.
“Njengengxenye yokulwisana nobugebengu, sizosebenzisana kakhulu neSafe City ukufaka amakhamera edolobheni kanjalo nasemigwaqeni ukulekelela ukuthi izinswelaboya zisheshe zibanjwe. Sizimisele ukusebenzisana nanoma iziphi izinkampani zokuphepha ezizimele,” kusho yena.
Uqhube ngokuthi inhloso ukukhulisa umnotho kanti okuseqhulwini ukudala amathuba omsebenzi ngesikhathi futhi bevikela imsebenzi ekhona. UMasipala uzimisele ukubamba iqhaza ezimbonini ezikhulayo njengeyokuthutha, ezokuvakasha, ezolimo nokudla kanjalo nokwenza ezolimo ibhizinisi njengezindawo zezikhumba kanye nengqalasizinda. Ukuzuza lokhu iMeya ithe bazimisele ukusebenzisana neminyango kaHulumeni.
Iphinde yabonga uMnyango Wezokuthuthukiswa koMnotho Nezokuvasha ngomsebenzi oqalwe eCaluza okuhloswe ngawo ukwelekelela izakhamuzi ukuthi zikwazi ukungena ku-intanethi mahhala okuluhlelo elubone njengoluzolekelela ikakhulukazi labo abampofu. “Kumele sisebenzise ubuchwepheshe emphakathini ukuze ithuthuke ikakhulukazi kwezemfundo, amabhizinisi kanjalo nakwezempilo,” kusho iMeya.
“Amanzi aseqala ukushoda emhlabeni wonke jikelele. EMsunduzi sisebenzisa okungenani amalitha angama-800 umuntu ngamunye ngosuku, okuyisibalo esiphezulu kakhulu kunaleso esabekwa emhlabeni okungamalitha ali-173. Lokhu kudalwa izindawo ezinjengekwaVulindlela, iGreater Edendale, iMbali kanjalo nesezindaweni nje ezinye ikakhulukazi kulezo ezinemijondolo.”
Ithe idolobha linezigidigidi ezi-R4, okuyimali eliyikweletwa ngabantu ngamanzi kanye nezinye izinsiza ezihlinzekwa uMasipala. Njengengxenye yecebo lokulwa nokulahlwa kwemfucuza ezindaweni okungafanele, uMasipala usuzofaka imigqomo ezindaweni zakobantu okulindeleke kuthi kuqale ngoNhlangulana ngonyaka ozayo.
“UMasipala uzokwenza isiqiseko sokuthi uhlinzeka umuzi nomuzi ngemigqomo engama-240 amalitha.”
Iqhube ngokuthi eminyakeni emithathu eyedlule, bebenezinhlelo zemizi engama-30 590 okumele yakhiwe yathi engama-2383 isixhunyelwe ugesi, eminye isaqhubeka kulindeleke ukuthi ingenzeki ngesabelomali esisodwa kepha kuwumsebenzi oqhubekayo.
“Izigidi ezingama-R30 zibekelwe ukuthenga izimoto kanye nezinsiza kusebenza zophiko lwakwaWaste.” Ithe izigidi ezintathu zibekelwe ukulungisa lezo zimoto ezikhona kepha ezifile. Izigidi ezi-R2, 5 zibekelwe ukuthenga imishini yokusika utshani. Isigidi esisodwa sibekelwe ukuletha ingqalasizinda emathuneni iHollin-Wood kanye naseThembeni ukuze kungasetshenziswa kakhulu iMountain Rise. Ithe njengezinye zezinhlelo zokulwa nokhuvethe sebe beke eceleni izigidi ezili-R15 zamanzi njengoba kulindeleke ukuthi asetshenziswe kakhulu kulesi sikhathi lapho kudingeka khona inhlanzeko.
“UMsunduzi ubhekene nezingqinamba zokuhlinzeka ngezinsiza okwenza singenzi kahle, okukhulu ukuthi lezi zingqinamba ziyakhula ngaphambi kokuthi sisheshe sinyakaze, uma sihluleka kuzophoqeleka ukuthi uMasipala uncike kakhulu emalini oyabelwa uHulumeni, okunzima ukusebenza ngaphansi kwakho. UMasipala uneqhingasu lokusebenza udaba lwezimali iNational Treasury olivumile ukuthi impela ungalisebenzela,” kusho yena.
Njengeqhingasu lokuqoqwa kwemali okusezingeni eliphezulu, iMeya ithe uMasipala uzothuthukisa indlela yawo yokusebenza amamitha amanzi uthole imniningwane efanele yalabo abakhokhayo, uthuthukise indlela abayisebenzisayo yokukhokhisa, wehlise nokuqagela. “Lezi zindlela zisetshenziselwe ukubuyisa lezi zigidigidi ezi-R4, ezikweletwa uMasipala.”
“Ugesi uzonyuka ngama-6,4% kwaEskom, izindleko zezidingo (rates) ama4,5%, imfucuza ama-4,5%, indle ama-4,5%, amanzi ama-9%. Konke okunye kuzonyuka ngama-4,5% kusuka lunye kuNtulikazi kwephezulu. Ukunyuka kwamanzi kanye nogesi kwenziwe ilabo abasihlinzeka ngakho. UMngeni wenyuse ngama-9% kanti uMasipala awufakanga mali yokwenza inzuzo. Kanjalo nakugesi uMasipala akukho nzuzo ozoyenza.”
UMasipala ubeke izigidi ezingama-R244 ukuqeda umsebenzi wezindlu, imali iqhamuka kuMnyango Wezokuhlaliswa Kwabantu. IMeya ithe uMasipala usazoqhubeka uhlinzeke ngengqalasizinda okungenani izigidi ezingama-R65 zibekelwe ukubhekana namanzi.