Ukhuvethe: Kulokhu singabaholi sonke, asibambisane
KUVAMILE ukuthi uma abantu bekhuluma ngamakhansela bathi bakhuluma nabaholi noma nobuholi babo. Ngaphansi kwenqubo yedemokhrasi le nkulumo ayimi ngoba vele njengamalungu omphakathi nasiqokela ukuthi sihole kepha okukhulu kakhulu ukuba sibe yizisebenzi zenu. Nokho esikhathini esiphila kuso ngaphansi kokhuvethe kuyafika kimi ukuthi sonke singabaholi.
UMengameli wezwe uRamaphosa ethula isigaba sesithathu izwe elabe lingena kuso, kule nkulumo ngaphansi komthetho olawula zinhlekele wakhuluma wajula lapho ethi konke “kusezandlelni zethu”.
La magama angikhumbuza lawo ashiwo ngumholi wethu nowayenguMengameli wethu wokuqala ngaphansi kwedemokhrasi uMandela omude ngesikhathi ethula ukuthi usezoshenxa emsebenzini wansukuzonke. UMandela wathi konke sekusezandleni zethu ukuba siqhube umzabalazo yena nesizukulwane sakhe ababesekhaleni lawo nabo bewuthatha kwabadala.
Kusuka kuqala ukutholakala kwegciwane lokhuvethe (COVID -19) kuleli uHulumeni wethu ngaphansi koholo lukaRamaphosa ukwenze konke ukwakha izinhlaka zokuvikela ukubhebhetheka kwalesi sifo. Wenze lukhulu ukufundisa kabanzi ngaso, khona lapho wenze lukhulu ukuzama ukuqoqa izimali zokulekelela izakhamuzi nemikhakha eyahlukene ezweni nemi ngaphansi kwegcindezi yezomnotho. Ungowokuqala uHulumeni ukuvuma ukuthi ngenxa yokujula komgodi lokhu asekwenzile akwanele.
NjengoMasipala silandela uholo lwakhe uMengameli uRamaphosa noNdunankulu wakwaZulu-Natal senza konke okusemandleni ukuba abantu baphephe, amabhizinisi asebenze ukuze umnotho ugeleze.
Namuhla sibhekene nenselelelo engadingi abaholi kuphela kepha edinga namalungu omphakathi. Sidinga wena njengesisebenzi soMkhandlu ukuthi wenze ngawo wonke amandla onawo ukulekelela ukuba siphume kulo mgodi esikuwo.
Ukunikezela kukaMasipala ngezidingo akungafadalali ubhekile ngoba uma kunjalo kusho ukuthi sonke sizoba sobishini. Kuwe njengelungu lomphakathi elingumzali kusezandleni zakho ukuba uqinisekise ukuthi emndenini, emphakathini nasemsebenzini uvikela abaseduze kwakho ukuze bangangenwa yilesi sifo.
Lolu holo engikhuluma ngalo aludingi iziqu noma izikhundla kepha ludinga isakhamuzi esingagcini nje ngokwazi ilungelo laso kepha nesikwaziyo okumele sikwenze ukuze izwe livikeleke. NjengeMeya yenu ngiyazi ngikhulumela uHulumeni wethu wendawo uma ngithi siyakudinga ukubambisana nawe ukwenza kwenzeke.
Siyakudinga njengoba nawe usidinga. Ingozi yokungahlangabezani yikuthi sonke sizobhubha. Ngishilo ngesikhathi ngethula umbiko wezinsuku ezili-100 ngoZibandlela nyakenye ukuthi sonke siphakathi nolwandle, sisemkhunjini owodwa.
Kithi akekho okumele acabange ukuthi uma umkhumbi lo uzika yena yedwa uyosinda.
Asilekelelane siphume kule ngozi esikuyo ukuze sibe nethuba lokuxoxa emva kwendaba ngalokho okumelwe kwenziwe ukugwema okufanayo ngomuso.