UMsunduzi uvivile ngokuvula imitapo yolwazi
SELOKHU kuqubuke ukhuvethe kuphoqelele ukuthi kushintshe indlela yokusebenza nendlela izinto ezenzeka ngayo ezinhlakeni ezahlukene.
Nanoma lisavaliwe izwe kepha kuneminye imikhakha eyisidingo okumele ivulwe.
Njengoba isivuliwe enye ingxenye yezikole, abafundi kumele benze imisebenzi yesikole. UMsunduzi umi ngomumo ukwamukela abafundi. ISikhulu semitapo yolwazi eMsundizi, uMnu uMandla Ntombela, ulandisa ngezinto abazenzile ukuze kube nokuphepha emitapweni yolwazi kulo Masipala.
UNtombela uthe emitapweni yolwazi ayiqaphile eMsunduzi bami ngomumo ukuthola umyalelo kuMnyango Wezobuciko Namasiko kanye naseMkhwandlwini. “Sesilungise zonke izinto kusukela kuzivikeli, ideski ngalinye linesibulalimagciwane. Izivikeli esinazo zingasilondoloza okungenani izinyanga eziyisi-8,” kusho uNtombela.
Uqhube ngokuthi isisebenzi ngasinye sizoba nesibulalimagciwane kuyo yonke imitapo yolwazi engaphansi kukaMasipala uMsunduzi.
UMsunduzi unemitapo yolwazi eli-11 ezindaweni ezahlukene kuthi emithathu ibe ngomahamba nendlwana ehambela ezikoleni kanye nasemakhaya abadala. “Imitapo yolwazi yethu ilinde umyalelo kuNgqongqoshe woMnyango Wezobuciko Namasiko ngoba ayenganyelwe uSALGA kuphela kodwa uma uMkhandlu uthi asivule sizovula. Ngokwethu besibheke ukuthi sizovula uma kuqala uNtulikazi,” kusho uNtombela.
Uthe okunye abazobe benakho umhubhe (tunnel) wesibulalimagciwane. “Kusetshenziswe enye ikhemikhali ongakwazi ngisho nokudlulisa ukudla kwakho kuyo kungakugulisi, lokho kuhlolwe uMnyango Wezempilo. Sikwenziswe ukuthi sifuna ukuqinisekisa ukuthi sizobe sikwazi ukulawula abantu abangena lapha futhi bangatheleli izisebenzi,” kusho yena.
UNtombela uthe kuzoba nezinguquko ngomthamo wabantu abazokwazi ukungena kumtapo wolwazi, lokhu okwenziwa ukuthi ezinye izihlalo zisusiwe ngoba bafuna abantu bahloniphe umyalelo wokuvulwa kwegebe phakathi kwabantu.
Uqhube ngokuthi kulabo abazobe befunda behleli phansi njengoba kukhona indawo eyakhelwe lokho, onogada abazobe beqaphile sebekuqeqeshelwe lokho.
Uthe kuzobe kunezisebenzi ezihlola amazinga okushisa kuwo wonke umuntu ozosebenzisa imitapo yolwazi.
Uzwakalise ukuthi izakhamuzi zizohlolwa uma zingena kodwa isisebenzi sinelungelo lokuthi sitomule umuntu sifune ukubheka ukushisa kwakhe. Uthe usazama ukuhlola ukuthi bangawuthola yini umshini ozokwazi ukuhlonza umuntu onokushisa okungaphezu kwama-38ºC uveze ubuso bakhe.
“Asinalo inani labantu esithi bazongena ezakhiweni ngoba kujwayeleke abangama-50 kodwa isakhiwo sethu sikhulu futhi sivuleleke ngokwanele phezu kwalokho abantu uma besebenzisa imitapo yolwazi basebenzisa izindawo ezahlukene kepha akusezofana nakuqala manje isibalo sesizokwehla. Sizosebenzisa ukuthi ofike kuqala nguye ozongena futhi akazokalelwa isikhathi ngoba sikholwa ukuthi umuntu oya emtapweni wolwazi usuke enesidingo mhlawumbe omunye uyobhalela ukuhlolwa kwakhe,” kusho yena.
Uthe uma umuntu engena emnyango uzothola ithikithi elizobe limkhomba lapho okumele aye khona ukuqinisekisa isibalo sabantu kulelo gumbi. UNtombela uveze ukuthi abantu abayozifundela izincwadi kanjalo nalabo aphethe izincwadi zabo abafuna ukuhlala phansi basavumelekile kepha kusazosebenza ukuthi ngubani ofike kuqala ngoba ngeke izakhiwo zisamumatha umthamo wabantu abebejwayele ukungena.
Ethinta udaba lokubuya kwezisebenzi uNtombela uthe: “Okokuqala sizobheka ukuthi labo abagulayo banakugula kuni silekelelwa uphiko i-Occupational Health njengomuntu ophathwa izinyawo ukhuvethe aluhambisani nezinyawo kodwa onesifo esihlobene nokuphefumula njenge-asthma asikwazi ukuthi simbuyise emsebenzini.”
Uthe zonke izinto ezihlinzekwa yimitapo yolwazi zisazoqhubeka zitholakale kepha kukhona abazokuqapha njengezisebenzi zemitapo yolwazi engomahamba nendlwana abahambela imphakathini njengoba kumele kuhlolwe ukuthi amanzi banawo yini.
“Izisebenzi eziya emakhaya abadala njengoba kusanemibiko ethi abantu abaneminyaka yobudala engaphezu kwama-60 yibo abasengozini kakhulu yokuhaqwa ukhuvethe ngeke sizithumele kulezi zindawo ngoba kumele sibavikele,” kusho yena.
UNtombela uthe uma sekuqale ukungena abantu inkampani ehlonziwe ukuthi ibulale amagciwane izokweqisa usuku bese iyafutha.
Umtapo wolwazi iBesie Head ingeminye yemihlanu eNingizimu Afrika eyiLegal Deposit Library, eminye eyilolu hlobo iBloemfontain Public Library eseMangaung, iNational Library of South Africa esePretoria Campus neCape Town Campus, iNational Library for the Blinds eseGramhstown neLibrary of Parliament esePhalamende eCape Town.
Umsebenzi weLegal Deposit Library ukuqoqa wonke zonke izinto ezishicilelwe ezweni. Bonke ababhali kumele bathumele kuwo omahlanu imisebenzi yabo. IBesie Head inolwazi oluqala kunyaka we-1830.
Uma umbhali engabhala incwadi bese angayisi kule mitapo yolwazi angaboshwa futhi naye uma incwadi yakhe engayitholi khona emuva kwesikhathi ayihambisa unemvume yokubopha uMbuso. Lokhu kusho ukuthi lo mtapo wolwazi uphethe amagugu ezwe abuye angatholakali ngisho nakwezinye izifundazwe. Okunye Izakhamuzi zaseMsunduzi okumele ziziqhenye ngakho ukuthi uNtombela unguMengameli we-African Library & Information Association & Institution okusho ukuthi emazweni angama-54 akhele izwekazi i-Afrika imitapo yolwazi yenganyelwe uNtombela ophinde abe