Alikazoshabalala igama nomnikelo kaGwala
NGOLWESIHLANU zingama-20 kuNhlaba loyo obalwa njengelinye lamaqhawe ekulweni nobandlululo, uMnu uHerry Gwala, ubeqeda imnyaka engama-25 adlula emhlabeni. Ukudlula kwakhe igama lakhe alishabalalanga njengoba eMgungundlovu, eMsunduzi, kwaqanjwa inkundla kanobhujuzwayo ngeHarry Gwala Stadium, okungasiyona inkundla nje engatheni kepha okudlalelwa kuyo ngisho imidlalo ye-ABSA Premiership, kwaphinde kwaqanjwa uMasipala wesiFunda ngokuthi iHarry Gwala District Municipality okunguMasipala owengamele iDr Nkosazana DlaminiZuma, uBuhlebezwe, uMzimkhulu kanye neGreater Kokstad. Igama likaMdala (Harry Gwala) lisaqhubeka njengoba isibhedlela esidume kakhulu esifundazweni iKwaZuluNatal, i-Edendale Hospital, uMphathiswa Wezempilo kulesi sifundazwe, uNkk uNomagugu Simelane- Zulu, wamemezela ukuthi sizoguqulwa igama sibizwe ngeHerry Gwala.
Ukushintsha kwegama kwalesi sibhedlela isinqumo sikaHulumeni wesifundazwe, lokhu kusho ukuthi igama likaMdala lisebenze ezigabeni ezintathu zikaHulumeni lapha eNingizimu Afrika njengoba kuqanjwe ngaye inkundla yebhola leso kwakuyisinqumo sikaMasipala wasekhaya uMsunduzi, bese kuba isifunda okuyiso uqobo iHarry Gwala.
UMphathiswa uMaSimelane Zulu ngesikhathi ethula isabelomali soMnyango wakhe muva nje uthe: “ukuhlonipha izithukuthuku zikaMdala sesithathe isinqumo sokuqamba kabusha isibhedlela i-Edendale ngaye. Lokhu kulandela emva kokuthi kwasona isibhedlela uqobo sinomlando onothile emzabalazweni.”
Waqhuba ngokuthi sebexhumene nomndeni kaGwala futhi bavumile ukuba bababoleke igama lakhe. “Sesixhumene noMasipala wesiFunda uMgungundlovu kanye noMasipala wasekhaya uMsunduzi njengoba kumele senze, okungukulandela imigudu efanele.” Washo kanje.
Waqhuba ngokuthi basazoqhubeka beyiSishayamthetho sesifundazwe ukudingida lolu daba uma isikhathi sesibavumela kahle.
Okunye aveze ukuthi kuzokwenzeka ukulungisa indlela esibukeka ngayo lesi sibhedlela.
“Asizogcina ngokuthi sibukeke kahle izindonga kepha sifuna nalabo abasebenzisa lesi sibhedlela bazizwe bephatheke kahle, lokhu sizokwenza ngokuthi silungise indlela yokuziphatha kwezisebenzi ukuqinisekisa ukuthi lesi sibhedlela siwumfanekiso kaMdala,” kusho uMphathiswa uMaSimelane Zulu.
UNkk uLindiwe Gwala-Gwambi oyindodakazi kaGwala, uthe bengumndeni bazizwa behlonipheke kakhulu ukuthi igama likayise lisazoqhubeka liphile emva kokudlula kwakhe emhlabeni. Uqhube ngokuthi lokhu kumhlonipha akusikona ukuthi wazabalaza nje kuphela kepha ukuthi wayezama ukunxenxa odokotela kanye nezinye izisebenzi ukuthi zingene enhlanganweni ebusayo.
“Ubaba wasebenza esibhedlela njengomabhalane kodwa waxoshwa ngoba wayenxenxa odokotela kanye nezisebenzi ukuthi bajoyine le nhlangano ebusayo. Siyakholwa ukuthi ngempela kufanele ukuthi lesi sibhedlela (Edendale) siqanjwe ngegama lika baba,” kusho indodakazi kaGwala. Iqhube ngokuthi izinhlelo zokushintsha lesi sibhedlela kade zaqala bajatshuliswa ukuthi bayabona sekuyaqhubeka. “Izinhlelo zaqala ngesikhathi uDkt uSibongiseni Dhlomo esanguMphathiswa woMnyango Wezempilo KwaZulu-Natal kodwa kunezingqinamba kwaphoqelela ukuthi kume okwesikhashana, uNkk uSimelane-Zulu ube eseqhubeka nalezi zinhlelo.” kusho yena.
UMphathiswa Wezemfundo esifundazweni iGauteng, uMnu uPanyaza Lesufi, wanxusa abantu ukuthi balandele izimfundiso kanye nobuhlakani bukaGwala. ULesufi wakusho lokhu ngesikhathi ehambele kwaDambuza ehambisana neHarry Gwala Foundation beyonikela ngokudla kubantu bakule ndawo abaswele. Le nhlangano ikwenze lokhu njengengxenye yomgubho wokuzalwa kukaGwala njengoba mhla zingama-30 kuNtulikazi ngabe uqeda mnyaka eli-100 ukube usaphila, le nhlangano yapha imindeni eli-150 okuya ngasethunjini.
“Njalo uma ngize ekhaya likaMdala ngiyakhuthazeka ngijabule kakhulu kuhle kwengane uma ibona amaswidi esitolo, uma ngibona izithombe zakhe. Ngiyafisa sikhuthazeke siphinde silandele ezimfundisweni zakhe,” kusho uLesufi.
Waqhuba ngokuthi igama lakhe alishabalele futhi liyohlezi likhona ngenxa yamagalelo akhe. “Ubuhlakani kanye nomqondo okhaliphile uyadingeka kuyimanje ngabe siqaphwe iwona futhi uyaseluleka,” kusho uLesufi.
UNkk uNtombi Mthembu wenhlangano iHarry Gwala Foundation uthe lena ngenye yezinhlelo abazenzayo ukuhlanganisa abantu ukuba benze umehluko. Uthi indawo yakwaDambuza ngeyesithathu njengoba beqale eSoweto naseTshwane. “Sinethemba lokuthi sizokwazi ukushintsha izimpilo zemindeni ekhahlamezekile egameni likababa uHarry Gwala,” kusho yena.