Kuyakhathaza ukulahla ezindaweni ezingafanele
KUQALE kwathi kuwo wonke amakhona emigwaqeni kube nendawo yokulahla ngokungemvume. Manje naphakathi nomgwaqo sekuba nendawo esiphenduke eyokulahla imfucuza. Okungenani endaweni engamamitha angama-250 sekunezindawo ezintathu lapho abantu belahla ngokungemvume eMbali. Ngenkathi uMasipala usuwenza uhlelo lokuhlambalaza abalahla endaweni engafanele, isikhulu sophiko lwakwaCommunity Services, uMnu uMbongeni Mathe, sathi uma ulahla ikakhulukazi ezindaweni zomphakathi, usuke uncisha ingane yakulowo mphakathi indawo yokudlala uphinde ufake izifo ezinganeni nakuzakhamuzi.
Emgwaqeni omkhulu oseFrance kunezindawo zokulahla imfucuza ngokungemvume ezine, umphakathi ukhala ngokuthi abantu abahamba ngezimoto abasenamahloni okujwiba imfucuza, omunye uvele apake bese evula imoto alahle. UMsunduzi uzikhucululile lezi zindawo kepha ziyaqhubeka izakhamuzi ziyalahla.
UNkk uZingiswa Chitha oyisakhamuzi saseFrance uthe: “Abantwana bahamba baye kulezi zindawo zokulahla bafike balinganise izinto ezinokungcola. Uma sibakhuza abalahla udoti babiza izindlu zethu esazakhelwa uHulumeni ngemikhukhu, bathi asihlukane nabo. Akusithina esihlala lapha esilahlayo, thina sisenza lokhu esasikwenza kudala ukumba imgodi bese siyashisa.”
Uthi kusuka abantu baselokishini bayolahla kulezi zindawo. Uqhube ngokuthi akukho okutheni abangakwenza beyizakhamuzi ngoba abafuni ukuphehla udlame kwazise abantu bayabadelela. Uthe ngelinye ilanga kuthe imoto ebikhuculula udoti ihamba kwabe kuma imoto ilahla imfucuza. Ukuchaze lokho njengesenzo esidelela uMasipala nesiphinda siwusebenzisele emuva.
“Eqinisweni ukuthi ngeke uMasipala ulokhu wenza into eyodwa, nathi sike sisuke siyizakhamuzi sihambe siyozibambela mathupha, sishise nokushisekayo ngoba indawo yethu siyayithanda, senza lokhu ngoba siyayithanda impilo yethu. Sike sibazise ukuthi sinezingane kodwa lokho abakugqizi qakala.” kusho yena.
UNkk uChitha uthe alukho uhlobo lwemfucuza olungalahlwa kulezi zindawo ngisho nezimfonyo, amanabukeni kanye namakhondomu. Uthi izingane zibuye zifike sezifake nezimfonyo ezizicoshe kuleziya zindawo, zifuthe amakhondomu asesebenzile, zithole zonke izifo.
“Ngiyadayisa kuleya ndawo ama-airtime namachips. Ukulahla kule ndawo kuyasihlukumeza ngoba siyazizamela, balahla isinkwa sabantabethu ngoba kumele izingane zilale zidlile.” Kusho yena.
Uthi uma kuhlanzekile njengoba uMasipala uhlanzile ngosuku bayakwazi ukulala okungenani bewenzile ama-R300 futhi nabezimoto bayakwazi ukuthi bame bathenge abakudayisayo.
UNkk uChitha uthe: “Kuyimanje kufanele engabe siqalile ukudayisa, ikakhulukazi njengoba izingane sezivulile nje, kodwa asikwazanga ngoba bekungcolile. Njengoba kunokhuvethe abantu uma bebona lokhu kungcola ngeke bathenge siyobe sivukela ubala nje. Emva kokuthi uMasipala uhlanzile sesizobuyela.”
Uqhube wathi baze bagqugquzele umphakathi ukuthi umbe imigodi njengoba kukhona abalahla nezinja ezifile bese kunuka indawo yonke eyakhele lezi zindawo.
“Lonke leliya phunga liza kithini, kugcina kuphazamiseka izingane ngoba azinazo izindawo zokudlala, laphaya ziyakwazi ukudlala ngoba azikho izimoto. Uma sihambile asisakutholi ukuphumula ngoba usuke unexhala lokuthi sezikuleya mfucuza,” kusho yena.
Uthi abasiyona imindeni engomacaphuna kusale ngalokho izingane zigcina zibone ukudla okuvaliwe kanti kulahlwe ngoba sekudlulelwe isikhathi zikudle. Uphethe ngokuthi bangajabulela noma ibhodi abazobona libhalwe uMasipala ukuthi akulahlwa lapha mhlawumbe lingavuselela unembeza kuzakhamuzi.