INhlokodolobha neWi-Fi yamahhala
NGESIKHATHI lapho umnotho wezwe ungemuhle, isibalo sabantu abangasebenzi siphezulu nalabo abebekade besebenza belahlekelwe imisebenzi ngenxa yokhuvethe kodwa abantu basakudinga ukuxhumana nezihlobo zabo ikakhulukazi njengoba kusasesigabeni semvalelwakhaya ngenhloso yokunqanda ukubhebhetheka kwalesi sifo.
Izinto eziningi manje sezisebenzisa ubuchwepheshe besimanje ukuthi zenzeke okudinga i-intanethi.
Kube nemibhikisho eminingi ngisho ezinkundleni zokuxhumana ngenxa yedata elimba eqolo kwaze kwavuka isiqubulo esithi #datamustfall. Izakhamuzi zaseMsunduzi sezibe nenhlanhla ngokuhlinzekwa nge-intanethi yamahhala. Ukuvulwa kwebroadband kwenzelwe esikoleni iVezokuhle Primary kwaMpumuza kanti nothi lwayo lukuso lesi sikole ngenxa yokuthi sisentabeni ngakho siyakwazi ukuphakela ezinye izindawo zaseMsunduzi.
Lesi sikole sakhiwe endaweni yeNkosi uZondi. Ukuvulwa kwale broadband bekwethanyelee nguNgqongqoshe Wezokuxhumana uNkk uStella Ndabeni-Abrahams.
UNgqongqoshe uNdabeni uthe: “IKwaZulu-Natal ephucuzekile kade yadingeka njengoba ukhuvethe selutshengisile ukuthi asisekho isikhathi okumele sisilinde, kufanele kushintshe indlela obekusetshenzwa ngayo njengoba abantu bengasathandi ukuya ezinxanxatheleni zezitolo ngenxa yokhuvethe sebethanda ukuthenga nge-intanethe. Ngakho-ke siwuHulumeni kumele sihlinzeke ngalokho.”
Uqhube ngokuthi ukwentuleka kwe-intanethi kuvimbela abantu ukuthi babambe iqhaza emnothweni. “Siyazi ukuthi lolu hlelo luzosebenzela wonke umphakathi, ngeke lulale izintuli emva kokuba seluvuliwe. Isifundazwe iKwaZuluNatal sizobonisa ukuthi kuyenzeka hhayi ngoba senzelela kepha ngenxa yokuthi ubuholi baso bulukhuthalele udaba lokusebenzisa ubuchwepheshe kuso.”
Uveze ukuthi bebezonikela ngama laptop angama-23 esikoleni iVezokuhle kepha ngenxa yokuzwa ukuthi lesi sikole sinezingane ezingaphezu kwama-300 uzongeza ngangama-50. “Sizothatha intsha engama-500, lapho asihlosile ukuthi sithathe izifundiswa kuphela kepha nalabo abangenaziqu, ukuze bezobona ukuthi bangasebenza uma sekuziwa ngasebuchwephesheni futhi bakwazi ukwenza imali,” kusho yena.
UMphathiswa woMnyango Wezokuthuthukiswa Komnotho, Ezokuvasha Nezemvelo KwaZuluNatal, uNkk uNomusa MaDube Ncube, uthe inetwork iyinkinga kulesi sifundazwe njengoba bengama-9% abane intanethi kuso. “Ukuhamba kancane kwebroadband kwenza ukuthi sibe nenkinga kunetwork. Singathanda ukuthi lolu hlelo silubone lushesha ngoba abafundi emanyuvesi bayakhononda ngenxa yokhuvethe, abakwazi ukuqhubeka nezifundo zabo,” kusho uMaDube Ncube.
Uveze ukuthi oMasipala iKokstad, iNewcastle, iKing Cetshwayo neLembe sebenayo ibroadband. Kulolu hlu sekungene noMsunduzi.
“NjengoHulumeni singathanda ukubona omasipala besebenzisa lolu hlelo ukuqoqa imali, sizodinga ukwesekwa nguwe Ngqongqoshe (Ndabeni-Abrahams) ukuze lolu hlelo lusheshe,” uMphathiswa.
Uqhube wathi ubona uhlelo olufike noNgqongqoshe lokufaka i3D printing lomqoka kanti nezingane zizokwazi ukuzakhela ziphinde zikhiqize amathoyizi azo. Ukuchaze lokho njengendlela ephusile yokuthuthukisa ukucabanga kwengane. Uthe le Wi-Fi yamahhala eMsunduzi izoze ifike ngisho esibhedlela e-Edendale naphakathi edolobheni njengoba ikhona nasemarenki.
Uthe bewuHulumeni sebesezinhlelweni zokuhlinzeka ngeWi-Fi yamahhala kuzakhamuzi zaKwaZulu-Natal ngoba bahlose ukudala amathuba emisebenzi. “Ngenkathi kwakhiwa lesi sigxobo bekusebenza omakhelwane abakhele lesi sikole kanjalo nabantu baseMbali, e-Edendale naseElandskop,” usho kanje.
Uqhube wathi bafuna ukuba yisifundazwe esiphucuzekile, esisebenzisa ubuchwepheshe kodwa lokhu okunzima ukukuzuza uma inetwork ingekho. “Siqinisekise ukuthi sisebenzisa izinto ezakhiwe lapha ekhaya, okuhlinzeka ngomlilo lesi sigxobo kwakhiwe eDube Tradeport,”kusho yena.
UDkt uRolls onguchwepheshe ku-Information Technology uthe: “Sabona igebe okumele silivale endaweni yasemakhaya enenkinga yenetwork. Uma siyokhothama eNkosini yakule ndawo yacela ukuthi sisebenzisane ngoba inenkinga yenetwork, uma siqhubeka silandelela sathola nokuthi uMnyango Wezokuthuthukiswa Komnotho, Ezokuvakasha Nezemvelo nawo usezinhlelweni zokwenza uhlelo olufana nalolu, ilapho sikwazile ukuthi sisebenzisane.”
Uqhube ngokuthi ngesikole iVezokuhle bebebonisa ukuthi ubuchwepheshe bangabuletha ezindaweni zasemakhaya. URolls uthe le broadband ihambe ize ifike e-Elandskop nakuMaspala uMshwathi athe kulingana nebanga elingamakhilomitha angama-40. Uveze ukuthi uMhloniswa uMaDube Ncube wabanxusa ukuthi basebenzise ingqalasizinda ekhona ukuze bagweme izindleko kanjalo nosomabhizinisi abancane ukuze nabo bathuthuke. “Lo msebenzi wenziwe ngosomabhizini abancane abangama-21. Lolu hlelo sasinesifiso sokuthi ludale amathuba emisebenzi,” kusho yena.
Obunye ubuchwepheshe obuthulwe nguRolls ilapho izingane zaseVezokuhle zakha amarobhothi ngokwazo. Waphinda wethula amadrone.
“Ngamadrone sifisa izingane zikwazi ukuthi uma zenza izifundo zesayensi bese zisebenzise wona ngaphandle kokuthi zize ziye lapho njengososayensi. Sifuna izingane zasemakhaya eziphucuzekile ezizokwazi ukucabangisa okosomabhizinisi,” kusho yena. Izingane zaseVezokuhle zikwaze ukuxhuma amarobhothi zisebenzisa i-intanethi, zase zindizisa amadrone ukubona endaweni ebuqamama nasesikoleni.