UMsunduzi uqinisekisa umnotho wendawo
ONGOTI bathi ukhuvethe luthikameze umnotho emhlabeni wonke jikelele. Njengengxenye yokwenza isiqiniseko sokuthi eMsunduzi uyafukuleka umnotho ngalesi sikhathi sokhuvethe iMeya uMzimkhulu Thebolla ivakashele inkampani i-ATM Tobacco Manufacturers ekhiqiza ugwayi, esendaweni yezimboni eMkondeni.
UMqondisi we-ATM Tobacco Manufacturers uMnu uYusuf Kajee uthe: “Manje esesikwenza ukuthi sisusa lapha esakha khona ugwayi eZimbabwe siwuletha lapha eMsunduzi sisebenzisa izigidi ezingama-R500. Manje sakha indawo yokukhiqiza eyizi-10 000m2. Lokho sikwenziswa ukuthi iZimbabwe neNingizimu Afrika iwona mazwe anogwayi ohamba phambili emhlabeni wonke jikelele.”
Uthe uma seyiphela le ndawo abayakhayo bazoqasha okungenani izisebenzi ezingama-200. “Zimbili izindlela esingenza ngazo. Ukusebenzisa ubuchwepheshe noma ukuthi kusebenze abantu. Thina sinesifiso sokuqasha abantu, ingakho sikhetha le ndlela yokuthi kusebenze abantu, lokho okungelula, kodwa sizokuzuza ngoba inhloso kuwukudala amathuba omsebenzi,” kusho uKajee.
Le ndawo ivuliwe njengoba kuyisigaba sesithathu sokuvalwa kwezwe, iyaqhubeka nokukhiqiza ugwayi, nanoma ungavumelekile ukuthengisa lapha eNingizimu Afrika. UKajee uthe: “Siyaqhubeka nokukhiqiza ugwayi othunyelwa kwamanye amazwe njengoba kuvulelekile ukuthi iphume impahla kuleli. Esingawukhiqizi owakuleli ngoba njengoba kuvalwe izwe akuvumelekile ukuwuthengisa.”
Uthe kuyamangaza ukuthi lapha eNingizimu Afrika abantu abathandi ukuthenga ugwayi wabo ngoba ushibhile, bancamela ophuma emazweni aphesheya kwezilwandle omba eqolo. “Abantu bakithi bancamela obizayo bazitshele ukuthi ingenxa yendlela owakhiwe ngayo kanti abazi ukuthi kusuke kubalwa nemali ohanjiswa ngayo uze ufike kuleli. Thina asinawo umgolo, uma senze inzuzo yesihlanu asinankinga kunokufuna ukwenza inzuzo yeshumi noma upondo qede ukuthengisa kuhambe kancane,” usho kanje.
Uthe babayazi ubumqoka beholo ezisebenzini zabo, wathi uyakuqinisekisa ukuthi njengoba sebeshintshe indlela yokusebenza ngenxa yokhuvethe, okungukwehlisa isibalo sezisebenzi ukuze kuhlonishwe igebe elikhona phakathi kwabantu kodwa akekho noyedwa ongaholanga iholo eliphelele.
“Siyayazi ingcindezi uHulumeni abhekana nayo ngenxa yamanzi. Ngelanga sisebenzisa amalitha angama-30 000. Ingakho sanquma ukuthi sisebenzise izigwedlo ukuzama ukonga amanzi nokungafaki ingcindezi kuHulumeni,” usho kanje.
Umqondisi uthe okunye abakwenzela uHulumeni kube ukwakhela amaphoyisa isiteshi endaweni yabo.
“Kule ndawo yezimboni isiteshi esiseduzane singamakhilomitha ayisi-7. Ngenxa yokuthi siyafisa abanye abanesifiso sokulondoloza lapha eMsunduzi bangakubukeli kude ukuphepha, bazi ukuthi isiteshi samaphoyisa siseduze nendawo yabo. Ngezinhlelo esibe nazo neSouth African Police Services ngabe sesiyasebenza inkinga kube ukuvalwa kwezwe,” kusho yena.
Lesi siteshi samaphoyisa sinanendawo yokugcina izinswelaboya. Uqhube ngokuthi njengengxenye yokubuyisela emphakathini bavule indawo yokudlala ichess. Uthe baqeda ukwakha indawo yokudlela ezobe ithengisa ukudla lapho izisebenzi zikaHulumeni zizobe zithenga ukudla ngentengo eyehlisiwe. “Izwekazi i-Afrika linothe kakhulu. Kuphela nje kumele sishintshe ukucabanga kwezingane zethu ngoba izona eziykusasa laleli zwe futhi sizikhuthaze ukuthi zingabheki ukuqashwa kepha zidale amathuba omsebenzi.”
IPR khansela uMahmood Oumar uthe: “Lo msebenzi kade waba isifiso sami ukuthi ube kuleli zinga okulo.Ukuqhubeka kwalo ngibonaukukhanya ngoba uzolekelela izakhamuzi zaseMsunduzi. Siyakuqonda ukuthi ikusasa laleli dolobha lincike ekutheni singamele amabhizinisi siphinde sinxenxe labo abanesifiso sokulondoloza kulo.”
IMeya uThebolla idlulise ukubonga egameni lezakhamuzi zaseMsunduzi. “Okuseqinisweni bengingazi ukuthi kuningi kangaka okuqhubekayo. Okumqoka kithi njengedolobha ukuqinisekisa ukuthi umnotho uyafukuleka, imsebenzi iyasunguleka khona kuzokondliwa izingane kuphele nobubha. Engizokuqinisekisa ukuthi njengoba ninesifiso sokukhula sizoneseka, siyakholwa ukuthi lokhu kuzohamba ibanga elide,” kusho iMeya.
Iphethe ngokuthi ngeke ikushiye ngaphandle ukuthi ifisa ukubona ulwazi ludluliselwa kulabo ababecindezelekile ekuqaleni kuleli zwe. UKajee uthe: “Lapho Meya siyaqinisekisa.”