Siyaphothulwa isigaba sesi-3 kwaJika Joe
NGENXA yezinxushunxushu eziningi kubenezinkinga ngokuphothulwa kohlelo lwezindawo zokuhlala kwaJika Joe. Isikhulu sophiko olungaphansi Kwezokuhlaliswa Kwabantu oyiProject Manager eMsunduzi uMnu uPhumlani Mbeje uthi uhlelo lokwakhiwa kwezindlu kwaJika Joe seluhamba kahle into ebibambe umsebenzi ukuthi uhlukaniswe izigaba ezine, okuwuphase 1, phase 2 ohlukene kabili u-A kanye noB bese kube uphase 3.
UMbeje uthe okwamanje umsebenzi oqhubekayo okaphase 3 obekuyindawo ebikhona kwaJika Joe ebiyinkundla yezemidlalo okwakuyiTertem. “Okwenze ukuthi siqale ngalesi sigaba ingoba indawo eningi kwaJika Joe idliwe imijondolo njengoba kunezakhiwo zemijondolo eziyi-3002 okudinga ukuthi lezi zakhiwo zisuswe ukuze kwakhiwe lezi zindlu futhi uhlelo luqhubeke kahle.”
Uqhube ngokuthi abanye babo ngeke bakwazi ukuthi bangene ezindlini ezikhokhelwayo ezakhiwa kuleya ndawo kepha kubiza ukuthi uMasipala ubakhele ezemixhaso ngoba abanayo imali engenayo ngenyanga. “Zihlonziwe izindawo okuzokwakhelwa kuzo laba bantu okuyiSignal Hill kanye neThembeni,” kusho uMbeje.
Echaza ngalo msebenzi oqhubekayo kwaJika Joe uthe zindlu zakwaJika Joe zingena ngaphansi kohlelo lokukhokha ngenyanga. Uthe abazokwazi ukuthi bahlale kuzo kuzobhekwa ukuthi umuntu ungenelwa imalini phakathi kwama-R800 kuya kuzi-R3500 ngenyanga.
“Ocwaningweni sithole ukuthi kunabantu abaningi okungasibona bokuzalwa kuleli abaqhamuka emazweni angaphandle ababalelwa kuma-36% kubantu abahlala kuleya ndawo. Abantu abangena ngaphansi kohlelo lwemizi ebheka iholo bangama-782, lapho kubhekwa ukuthi uhola kangakanani phakathi kwe-R0 kuya kuzi-R3500. Bese okumele bakhelwe izindlu uHulumeni mahhal bangama-784 okuyilabo abazoya kulezi zindawo ezihlonziwe. Abangama-800 abahola phakathi kwama-R800 kuya kuzi-R3500 abangena ngaphansi kohlelo lolu oluqhubekayo bayi1023 okungama-34% wesibalo sabantu abakwaJika Joe,” kulanda uMbeje.
Uthe kukhona abahola ngaphezu kwezi-R3500 abangena ngaphansi kolunye uhlelo lwezindlu okuthiwa iSocial Housing. Lolu okuba uhlelo lwezindlu oluba sezindaweni ezisondelene nedolobha. “Ekuqaleni uJika Joe wawungena ngaphansi kweSocial Housing kodwa ngokubonakala ukuthi abantu bakwaJika Joe basondelele ezindaweni zomsebenzi ngoba abanamali ukukhokhela izindawo ezibizayo, ingakho banquma ukwakha imijondolo,” kusho yena.
Uqhube ngokuthi uMasipala uke wazama ukwakhela izakhamuzi zakwaJika Joe njengoba iningi labo linezindlu abaqashisa ngazo eFrance. Uthe ngenkathi bakhelwa iphutha elenzeka ukuthi sishaywe indiva isizathu sokuthi kungani besondelene nedolobha, okuwukuthi bazizamele kahle eduze nedolobha, okwaholela ekutheni bazishiye izindlu babuyele emijondolo yabo.
“UMasipala ubeke ukuthi kunokuthi ubasuse laba bantu kungcono ubakhele lapho bekhona uhlelo oluzokwazi ukuthi noma ubani ohleli laphaya akwazi ukuhlala ngoba iningi labantu abahlala khona baqashile, bakhokhela imikhukhu. Imali abayikhokhayo iyathusa ngoba iqala kuma-R500 ngenyanga, okuyimikhukhu engenamanzi kanye nogesi,” kusho yena.
Uthe isona sizathu esaholela ekutheni kungabi iSocial Housing. Uthi lokho ikona okwabambezela umsebenzi ngoba uMnyango Wezokuhlaliswa Kwabantu, okuyiwo okhipha imali ukwakha lezi zindlu wawuthi akukwazi ukuba icommunity residential unit (CRU) endaweni ephakathi edolobheni, kwaze kwabiza ukuthi uMasipala ubeke izizathu ezinqala ukuthi kungani kumele kube iCRU.
UMbeje uthe isigaba sesithathu lesi esiqhubekayo basiphuthuma ngendlela yokuthi ngoZibandlela kophezulu kumele sibe sesiphelile bese kuthathwa ingxenye yezakhamuzi zingene ngaphakathi, kusale kuvuleka isikhala ukuze kukwazi ukuthi kuqale isigaba sokuqala okumele engabe sakhiwa lapho okunemijondolo okwamanje.
“Kusuka lulunye kuMasingana kuzobe sekuhlala abantu abangama-452. Isizathu sokuthi sibafake ngalolu hlelo ukuthi asinayo imali yokubakhela izindlu zesikhashana, bese ukwakhiwa kwezindlu kuqhubeke ingakho kwahlukaniswa izigaba.”
Mayelana nokusalela emuva kohlelo lwezindlu zemixhaso uma kuqhathaniswa nomsebenzi wakwaJika Joe, njengoba yona isasesigabeni sokuhlela uthe: “Inhloso kwakuwukuthi ngesikhathi kwakhiwa kwaJika Joe nemixhaso ibe yakhiwa ukuze nabantu basuswe kwalula.”