Konke kumi ngomumo ukubhekana nemililo
EZINYANGENI eziyi-6 ezedlule uMasipala waqoka inkampani iSurg Suit ezoqapha indawo enkulukazi yokulahla imfucuza iNew England Road Landfill Site. Ukuqubuka kwemililo nyakene besekuyinto ebingasabaleki. Nokho ukufika kwale nkampani kukunqandile ukusha kwale ndawo njengoba kulawulwa ngisho abantu abangena khona. Nokho emva kwesikhathi eside kwagcina ukubikwa ngomlilo usuphinde waqubuka. Onogada bahlabe umkhosi phakathi kwamabili mhla zingama-20 kuNtulikazi ukuthi sekuqala umlilo.
UMnu uWilson Mhlongo oyiskhulu esiphezulu se-Unit uWaste, oqale ngoMbasa uthi indlela abayisebenza ngayo iLandfill basuke bekucabanga ukuthi umlilo ungaba khona kepha kumele ulawuleke kalula ngenxa yokuthi balandela imgudu yokulawula iLandfill. “Esingakusho sikuqinisekise ukuthi bebengekho laba bantu abaphila ngokucosha imfucuza ngesikhathi sokuqala komlilo, ikakhulukazi njengoba bebebuye balale ngaphakathi esikhathini sangaphambilini, manje akusekho muntu osevumelekile ukuba abekule ndawo kusuka ngehora lesi-5 ntambama. Kusuke sekuvumeleke onogada kuphela kodwa esingeke sakumbathisa ukuthi lufakiwe ucingo kodwa esikutholile ukuthi sekuvulwe upotsho, esingeke sakuqinisekisa ukuthi uvulwe ngoba kuqala umlilo noma uvulwe nini lokho kusazolandelelwa.”
Uqhube ngokuthi indela abasebenzisana ngayo nale nkampani yenze kube lula ukulawula umlilo njengoba ezikhathini ezedlule umlilo bewusha ubuhanguhangu iLandfill yonke kepha manje sekusha isiqephana esincane. “Senza isiqiniseko sokuthi uma senza amaqhingasu okulawula le ndawo uma singakagqingqi siqala ngokwenza imfucuza iziqeshana nokuthi kube lula ukuhamba phakathi kwayo. Ikona lokhu okwenza kube lula ukuthi izicishamlilo zihambe phakathi kwayo nokwenza lo mlilo bawunqobe ngokushesha,” kusho uMhlongo.
Lo mlilo uqubuka nje ngenyanga eyedlule bekuvulwa ngokusemthethweni iweighbrigde, okungezinye zezinto ezilawula imfucuza engena kule ndawo futhi ekwaziyo ukuhlonza leyo mfucuza enobungozi engaholela ekutheni kuqubuke umlilo.
UMhlongo uthe: “Ukuvula kwethu iweighbrigde kusilekelelile ngokuthi sikwazi ukubheka imfucuza engena kule ndawo (Landfill site) kepha imfucuza ekhiqiza igesi imethane eyenza ukuthi kubelula ukuqubuka komlilo futhi kuthathe isikhathi eside ukuba ubonakale umonakalo walowo mlilo, noma sekubonakala amalangabi futhi ngesinye isikhathi kuyenzeka angabi bikho amalangabi kepha kube nentuthu nje kuphela.”
Uthe basebenzise amaloli amanzi kaMasipala amathathu, izicishamlilo ezimbili, amapay loader amabili kanye necompactor eyodwa eqinisekisa ukuthi uvimba umlilo ukuba ungakapakeli kulezi ezinye izindawo ezingenawo umlilo.
Uveze ukuthi uMasipala wesifunda uMgungundlovu unikele ngeloli kanye nezisebenzi ezicisha umlilo, uMnyango Wezemvelo wanikela ngezicishamlilo kanye nezisebenzi zohlaka lwawo iWorking on Fire, iDurban Metro inikele ngezimoto ezicisha umlilo kanye nezisebenzi. Lonke lolu sizo uMhlongo uthi kuthe kusa besebefikile endaweni yesigameko ukuzolungisa umonakalo.
“Inkinga esinayo njengamanje ukushoda kwemishini okuyiyo esebenza ilandfille site kodwa sisebenzile ngale mishini esinayo noma inganele, okuthokozisayo ukuthi uMasipala unaso isixazululo njengoba kusabelomali sakulo nyaka wezi-2020-21 ibekwe imali yokuthenga imishini esingakungabazi ukuthi izolekelela kakhulu ekuletheni ushintsho kulandfill site,” kusho yena.
Uqhube ngokuthi bebeqashe icompactor eyodwa efike yehluleka, bebesalinde inkampani ibathumelele enye.
“Lolu hlobo lomlilo bekungelona olujwayelekile njengoba belokholeke izingxenye ezithile kungasiwo umlilo okulula ukugxila endaweni ethize ingakho kuthathe isikhathi esingangesonto ukuwucisha,” kusho yena.
UMnu uMbongeni Mathe oyiSikhulu Esiphezulu soMnyango iCommunity Services lapho imfucuza ingolunye lophiko olungaphansi kwakhe uthe: “Ukuqoka le nkampani kusilekelele kakhulu njengoba kuyibo abaqaphe le ndawo futhi kuyibo abakwazile ukuwubona ngokushesha. Inkinga ngalo mlilo akusikhona ukuthi uvele ucishwe nje njengowotshani okumele uthele amanzi, wona udinga ukuba kumbiwe ukuze ucishwe nangaphansi ngenxa yegesi engaphansi eyenza kubelula ukuthi umlilo usabalale.”
UMnu uMathe uphethe ngokuxolisa ngalo mlilo kulabo abakhele uMsunduzi.
“Siyazi ukusha komlilo akusiyo into enhle ingakho senza konke okusemandleni ukuthi ucishwe ngokukhulu ukushesha futhi uma senza amaqhingasu okulawula ilandfill senza isiqiniseko sokuthi nomlilo asiwulibali. Usizo esilutholayo siyalwamukela kakhulu futhi lwenza omkhulu umehluko ngokusebenzisana kwezinhlaka zikaHulumeni,” kusho uMnu uMathe.
Ukuqoka le nkampani kusilekelele kakhulu njengoba kuyibo abaqaphe le ndawo futhi kuyibo abakwazile ukuwubona ngokushesha