Ukusebenzisana kwezinhlaka zomphakathi
UKUFIKA kokhuvethe eNingizimu Afrika kwenze kwabonakala ukuthi iminyango kaHulumeni iyadingana futhi iyanikezana ngomsebenzi. Akugcinanga kuHulumeni kuphela kepha kuphinde kwasebenzisana amabhizinisi azimele noHulumeni. Inkampani iSign Wood inikele ngezimfonyo ezingama-30000 eMsunduzi ukuba izakhamuzi ziphephe njengoba kuhlasele ukhuvethe.
Isikhulu senkampani iSign Wood uMnu uDieter Kusel sithe: “Sisanda kuqala ukufaka iFibre Network eMsunduzi sabona ukuthi kukhona okuthile okumele sikunikeze izakhamuzi ngoba vele sisebenza ngawo umphakathi.” Uqhube ngokuth ilokhu bakubone kumqoka ukuthi bakwenze ngaphandle kokuthi beyinkampani basungula amathuba omsebenzi.
“Siyinkampani eMsunduzi uwodwa sesiqashe amalungu omphakathi angama-1500. Esaziyo ukuthi bazokwazi ukuxosha ikati eziko okungenani izinyanga eziyisi-9 kuya kwezili-12, siyazi ukuthi maningi amathuba asazovela ngoba inetwork isazodinga ukuba inakekelwe ngaphandle kokuthi ifakiwe nje,” kusho uMnu uKusel.
Uqhube ngokuthi bebenesifiso sokuthi uma befika eMsunduzi bangafike nje bese behamba kepha bashiye abayohlezi bekhunjulwa ngako. Uthe izisebenzi abaziqashayo bazipha amakhono abangaphinda bawasebenzise uma sebeyofuna imisebenzi kwezinye izinkampani.
Uthe okumqoka kubo ukufundisa labo abangazi lutho nabangenalo ikhono njengokuthi ifibre network isebenza kanjani. “Siqikelele ngokuthi asigcini nje ngokuqasha izakhamuzi zaseMsunduzi kepha siphinde sanika umsebenzi nosomabhizinisi abancane balapha eMsunduzi, okuyibo abafaka amanetwork emzini yabantu,” usho kanje.
Uqhube ngokuthi okubagqugquzelile kulezi zimfonyo ukuthi wonke umuntu uthwele nzima kulolu bhubhane, wonke umuntu unesidingo sokuzivikela kanti akusiyena wonke umuntu onamandla okukwazi ukuthenga isimfonyo, ingakho bebone ukuthi banikele.
ISekela Meya uKhansela uMinillal Inderjit lithe: “Siyakwamukela ukunikelelwa ngezimfonyo i3ply, okuluhlelo inkampani elisungulele ukulekelela izakhamuzi zaseMsunduzi. Siyazi ukuthi leli inani elincane uma kuqhathaniswa nenani labantu abayizakhamuzi zaseMsunduzi kepha zizokwenza omkhulu umehluko.”
Uqhube ngokuthi bewuMasipala babone kungcono ukuthi banikele ezibhedlela, izikole kanye nasezitolo okuyizo ababona ziba nomthamo omningi wabantu abaya kuzona. “Izibhedlela esizihlonzile iNorthdale ne-Edendale, isitolo uSupersave isona esinabantu abaningi abaya kuso, nabezindaba amehlo abo abelokhu ethe njo kuso ngisho noNgqongqoshe WamaPhoyisa uMnu uBheki Cele wasivakashela lesi sitolo ukuqinisekisa ukuthi siyayilandela imigomo yeCovid 19,” kusho iSekela Meya.
Liqhube ngokuthi okuyisifiso sabo ukuthi kungabi bikho muntu ozojikiswa ngoba engenaso isimfonyo, lokhu okwenziwe inkampani iSign Wood bayakubonga ukuvala lelo gebe njengoba izibhedlela kuyizo ezisekhaleni lokhuvethe. “Siyazi ukuthi uma sithenga thina siwuMasipala kunemidanti, lezi zimfonyo eziza kanje ziqhamuka ngaphandle siyazamukela kakhulu futhi sinxusa nezinye izinkampani ukuba ziphonse esivivaneni,” kusho yena.
Uqhube ngokuthi babone kumqoka ukuba bahlonze izikole ezingenabo abantwana abangomacaphuna kusale ngoba abafisi ukuthi kube nomfundi ojikiswayo ngoba engenaso isimfonyo njengalesi sigameko esenzeka eBulwer kujikiswa ingane yagcina idlwengulwa.
Uqhube ngokuthi kunabantu abaningi abangosomathuba abenza izenzo zobulwane abathola ithuba lokulutha abantu ngoba bazi ukuthi abanalutho, bayakholwa ukuthi izimfonyo zingaklama indima emqoka ukuthi nesizwe siphephe. “Sibonga imkampani efikile kuleli dolobha lethu njengoba seyifake isandla ekufukuleni umnotho wedolobha,” usho kanje.
Isibhedlela iNorthdale singezinye ezizuzile kulolu hlelo, uNkk uKholeka Makhathini oyiActing Chief Executive Officer uthe: “Sithanda ukubonga iSekela Meya ngemizamo yalo ngokuhlezi liqikelela ukuthi isibhedlela sethu sihlezi sisizakala. Njengoba sonke sazi ukuthi isibhedlela sethu sikhahlamezwe kakhulu ukhuvethe njengoba kuyimanje kuyiNorthdale ehamba phambili ngesibalo sabantu abahaqwe ukhuvethe eMsunduzi.”
Uphethe ngokuthi lolu bhubhane aluthikamezanga iziguli kuphela kepha nezisebenzi. Uqhube ngokuthi izipho abazithola kuMasipala nasezinkampani zizokwenza ukuthi balunqobe lolu bhubhane. “Siyabonga nokufika komholi wendawo njengoba kusinda kakhulu ukusebenza kule ndawo, ukufika kobuholi kuzogqugquzela nezisebenzi zakulesi sibhedlela ukuba zisebenze kakhulu futhi zikhuthale ngoba ziyazi ukuthi umsebenzi wazo uyabonakala,” usho kanje.