UMasipala usheshisa olokuthengwa kwemizi
SEKUZE kwajwayeka ukuthi ukuthenga umuzi nokushintsha umnikazi kuthathe isikhathi eside. Ngeke kwabalekelwa ukuthi lokho akukuhle futhi kunomthelela omubi ngisho emnothweni wendawo ngenxa yesizathu esisobala ukuthi ngisho abatshalimali bangaze bashintshe umqondo kade sebezimisele ukuthenga leso sakhiwo.
Ngokujwayelekile uphiko lwakwaRates lukhipha isitifiketi esibizwa ngeRates Clearance esitholwa emuva kokuthenge umuzi noma kokushintshwa kobunikazi ngenxa yezizathu ezahlukene okungaba isahlukaniso noma ukushona kobengumnini womuzi. Ngaphambi kokuphuma kwalesi sitifiketi isicelo sidlula eminyangweni emihlanu. UMnu uMoges Pillay oyiskhulu salolu phiko uthi lokho sekuwumlando.
“Manje abameli ababhekelela ukushintshwa kwezindlu sebengafaka isicelo sokushintshwa komninimuzi ngokusebenzisa i-intanethi futhi usifaka noma ikuphi noma ngabe uphesheya kwezilwandle futhi noma ngabe isikhathisini akusadingeki ukuthi abafaka isicelo beze ezakhiweni zikaMasipala bachithe isikhathi sabo befaka isicelo.”
UPillay uthe isizathu esenze baqhamuke nalolu hlelo ukuthi noma ngabe loyo ofake isicelo ubefisa ukulandelela ukuthi selukephi udaba lwesicelo sakhe bekuba umthwalo ukuthola ukuthi kudingeke ukuba kushayelwe lama hhovisi kubhekwa ukuthi ifomu lesicelo likuluphi uphiko.
Lama hhovisi athintekayo bekungeleConsolidated Billing, iCredit Control, iSundry Debtors, iHousing kanye ne-eValuation. UPillay uthe: “Ngesikhathi kusangamaphepha bekulula ukuthi kube nenkohlakalo kungaba izisebenzi zigwazelwa ngoba labo abafake isicelo bejahe udaba lwabo lusheshe luphothulwe. Ngeke sikubalekele ukuthi bekuthatha isikhathi eside, okuyizinyanga ezine kuya kwezinhlanu.”
UPillay uthe ukuthi izicelo ziye kula mahhovisi ahlukene kunezizathu ezimqoka njengelezindlu lapho kufanele o kuqinisekiswe ukuthi leyo ndlu ibhalwe ngaye ngempela yini ofaka isicelo ukuthi bekungeyakhe, nele-eValuation lona kumele libone ukuthi inani lendlu liyiyo leli ebhalwe phansi, iCredit Control ibheka ukuthi leso sakhiwo sikweleta malini kwaMasipala.
Lolu hlelo olubizwa nge-E4 uthe uPillay yonke into yenzeka kulona.
“Kulula ukulandelela ku-E4, ofake isicelo uyabona ukuthi iliphi uphiko olungakaphothuli ukwenza umsebenzi futhi kuyangisiza lokho ukuba ngithole ukuthi ngobani abadembeselayo, ngalokho ngizokwazi ukubona abangasebenzi.”
UPillay uthe phezu kwakho konke kodwa bekulula ukulahleka kwezicelo kanti angakudingi ukuthi kuthiwe udaba lusetshenzwa ngubani.
“Inhloso yalolu hlelo ukuthi yonke into ilandeleleke kungashiwo ukuthi ubani akekho okunguye osebenza lolo daba. Iphinde yehlise izindleko zamaphepha njengoba ngenyanga kutholakala izicelo esilinganiselelwa ema-400 kanti isicelo ngasinye sinamaphepha alinganiselwa kwali-15.”
Uqhube ngokuthi ubuhle balolu hlelo ukuthi isicelo asisoze sasuka ku-E4, ukusayinwa kwamaphepha, ukukhishwa kwesitifiketi kwenzeka kuloluhlelo, lokhu kwamukelekile ehhovisi lamatayitela. “Lolu hlelo luzothuthukisa ubudlelwane phakathi kukaMasipala nosomabhizinisi ngoba kuzobalula yonke into ukuthenga imizi, luzophinda lulekelele kakhulu kuMasipala ekutheni kuqoqweni imali bese ibuye isebenze ukuhlinzeka umphakathi ngezinsiza,” kulanda uPillay.
Lolu hlelo akusikhona ukuthi luyaqala kodwa balubuke ngoMandulo ukuthi luyakwazi yini ukusebenzela izakhamuzi zaseMsunduzi kanye nalabo abafisa ukulondoloza eMsunduzi, lapho kuthathwe izinkampani zabameli ezine ukuthi zilusebenzise ukufaka izicelo kwangena ezingama-32, lezo zicelo zaphuma ngezinsuku ezili-10.
Upillay uthe: “Into eyenza lolu hlelo lusheshe ukuthi ngenkathi umuntu efaka isicelo akulindwa ukuthi omunye aqede, akunikezelwana ngomsebenzi, umuntu udlala indima yakhe ngaso leso sikhathi.”
Noma kungaba nobuhle obunjani kodwa izingqinamba ziyohlezi zikhona ikakhulukazi uma kuwuhlelo olusha. UPillay uthe umsebenzi usungaphezu kwezisebenzi eziqashiwe kodwa ukuxazulula lokho balandele umthetho kaMasipala ukuthi umsebenzi uqale ukhangiswe ngaphakathi bese uphumela ngaphandle.
“Sesikhangise ngemisebenzi emihlanu ngaphakathi ukuze siqinisekise ukuthi siyaqhuba futhi lokhu esithi siyakwenza kubonakale emphakathini,” kusho uPillay.