Abantu abagcine imiyalelo kathaqa
KUYADABUKISA ukufunda ngezigameko zokuboshwa kwabantu, beboshelwa ubudedengu bokungakwazi ukuziphatha nokuhlulwa ukubekezela imigomo kahulumeni elawula izwe. Lokhu ngikusho ngenxa yodaba oluphume kuleliphephandaba, lokuboshwa kowesifazane ngamacala okushushumbisa utshwala nogwayi.
Lona wesifazane waseThobothini, ngaseJozini, uze wakhishwa ngebheyili ka-R3000, ngenxa nje yokwephula imiyalelo kathaqa, njengoba utshwala nogwayi busavaliwe ezweni. Kuyihlazo elikhulu ukuboshwa komuntu wesifazane ngamasosha esathenga utshwala kubantu baseMozambique emngceleni.
Ngaphandle nje kokungena ekujuleni kodaba lwalomuntu wesifazane, kodwa kubalulekile ukuthi abantu bonke abayizakhamizi zakulelizwe bahloniphe, balalele, bagcine yonke imithetho ebekwe wuhulumeni, njengoba izwe lisengaphansi kwesikhathi sikathaqa, sokuvalwa kwayo yonke into ezweni.
Njengoba nje sisesigabeni esibizwa ngo level 4, kuyaziwa ukuthi utshwala nogwayi akuvunyelwe. Ngakho ukuboshwa kwalona wesifazane, ogama lakhe linguSilindile Silwane, kukhombisa ngokusobala ukuthi abantu abafuni ukuhambisana nemigomo ebekwe nguhulumeni yokulawula izwe.
Sisempini lapha, sibhekene nedimoni elikhulu kabi, lalesi sifo se-Corona esibonakala sidla fumuka sidla silaza. Ngakho kubalulekile ukuthi bonke abantu bakuqonde ubungozi balesi sifo nokuhlala bazivikele, njengoba kunxusa uhulumeni wethu.
Ngokuchaza kokhulumela amaphoyisa, uKapteni Nqobile Gwala, lomsolwa udluliselwe esiteshini samaphoyisa saseManguzi, wase ebekwa icala lokutholakala nogwayi notshwala ngesikhathi sikathaqa.
Okunye okushaqisile ngalomsolwa wesifazane ngukuthi, ungumuntu osebenza ngaphansi koMnyango Wezempilo esifundeni Umkhanyakude.
Lesigameko sokuboshwa kwalona wesifazane sithuse ngisho Inkosi Mabhudu Tembe wesizwe sakwaTembe, khona eManguzi.