Usewukhokhovula obengumculi
SILXAZE ivangeli nenkolo yobuKrestu sangena emkhakheni wokwelapha ngokwesintu, isilomo somculi wokholo saseNkodibe eMtubatuba.
UMnuz. S’manga Fakude (39) osaziwa ngoMkhulu Mtolo, uqale ukushaya amathambo ngonyaka odlule, ngemuva kokuba ethole amandla okugila izimanga ngemithi yesintu.
UFakude ugqame kakhulu emculweni wokholo kusukela ngonyaka ka-2002, ecula eqenjini laseSwazini iShongwe and Khuphuka Saved Group, eliholwa nguMnu Ellias Shongwe. Ngonyaka ka-2008 uqale ukucula ngokuzimela, nokuyilapho akhiphe eyakhe i-album kwaze kwaba wunyaka ka-2016 elokhu ewakhipha.
Leliphephandaba liqala ukuhogela lezi zindaba ekuqaleni kwalonyaka, okuthe ngokuhamba kwesikhathi lamvakashela esigodlweni sakhe esiseDukuduku, khona eMtubatuba.
UFakude uyahlola aphinde elaphe, okuhlanganisa nokuqinisa imizi nabantu. Uthi selokhu eqale ukwelapha abantu, impilo yakhe ihambela phezulu. Uthi ukuphumela kwakhe ngokuthi akasahambisani nenkolo yobuKrestu, kwaholela ekuxoshweni kwakhe yibandla ayekhonza kulo, kodwa futhi akazisoli ngesinqumo sakhe.
Uthe isinqumo sakhe sokulaxaza ukholo lwakhe wasithatha ngemuva kokuba eqale wakhuleka kunkosikazi wakhe, agcine engamdalulanga igama nesibongo sakhe.
Lensizwa ibivutha futhi ihlonishwa nasebandleni ebikhonza kulona, i-Light of Christ Ministries. Konke lokho sekuyiphupho ukuthi yake yafaka amasudu ikhonza ingena umuzi nomuzi ishumayela.
‘Ngingene emculweni ngoba ngifuna ukuhambisa umyalezo wevangeli nangokwelapha abantu ngokomphefumulo, kodwa konke lokho sekufana neze ngoba kangiselona ikholwa njengoba abantu bebengazi. Selokhu ngiqale ukwelapha kuyabonakala ukuthi ngibhekephi ngempilo.
‘Amaqola adla izimali ngathi singabaculi ayisizathu sokuthi ngigcine ngiwulaxazile umculo. Bengihlupheka kodwa igama lami laziwa. Ingoma yami idlalwa nsuku zonke emisakazweni kodwa mina ngilambile.’Akakufihli nokuthi ngonyaka odlule uhambile wayolanda amandla (ukuthwala) kwaMhlabuyalingana.’Mina ngithwele futhi angikufihli ukuthi ngathwaliswa ngubaba uMxolisi ‘Dr Mkhulu’ Nkomonde waseBhambanana KwaMhlabuyalingana. ‘Selokhu ngathola lento eyangiphambanisa nevangeli engakhuliswa ngalo ekhaya kithi eMtubatuba, ngiziphilela impilo ewubukhazikhazi.
‘Ngihamba ngemoto engiyifunayo. Angeke ngikudalule ukuthi ngigabe ngaziphi izinhlobo zemithi yokwelapha ngaphandle kokuthi ngikutshele ukuthi mina ngiphatha lonke uhlobo lomuthi.
‘Mina ngifana nomoya ngoba wona uphephetha lapho uthanda khona. Angibulali muntu kodwa umuntu othakathayo uyena osuke efuna ukufa ngezenzo zakhe ezingalungile. ‘Othumela abantu ngomantindane nami ngimnika bona. Namanje ngizihlalela lapha eDukuduku ngawo umsebenzi wami wokwelapha.
UDokotela Mkhulu ubaba kaMashulamu, ukugcizelele ukuthi
uyamazi uFakude.’USmanga Fakude ngimazi ewumculi kusuka kudala. Ngonyaka odlule ufike lapha kimi ezocela ukuba ngimthwalise ngamnika zonke izeluleko nemigudu okufanele ayilandele,’ kunqamulela uDkt Mkhulu.