Osewukhokhovula wenyanga obengumculi wokholo
ILUNGU leqembu lezokholo, iThemba Gospel Group, uMnuz. Zakhele Dlamini, uthi ozokwamukela noma isiphi isinqumo esizothathwa ngozakwamo mayelana nekusasa lakhe kuleliqembu njengoba esemukele ubizo lokuba inyanga eyelapha abantu ngesintu.
UMnuz. Dlamini, osedume ngelika Dr Dlamini ‘Ikhosi’, uthi usethathe isinqumo sokugxila kulomsebenzi wokwelapha emva kokuhlangabezana nezinkinga eziningi, ngesikhathi ezama ukubalekela ubizo lwakhe, oluyisiphiwo sabadala.
‘Yize lomsebenzi wabadala udinga isikhathi esiningi, kodwa ngisathanda ukuqhubeka nokusebenzisa italente lami lokucula nokudumisa uNkulunkulu.
‘Ukuba nobizo kimi kwavela ngisemncane, ngisafunda ibanga lesihlanu (Grade 7), kwakuthi uma ngitshela uthisha wami ngezinto ezazenzeka kimi avesane angihleke. ‘Kuqhubekile kwaze kwaba ngenza ibanga lesikhombisa,nokuyilapho ngaphoqeleka ukuba ngiyothwasa. ‘Ngiqale emva kwalokhoke ukwelapha abantu, kodwa bengingagxilile kakhulu kukho. Okubi ukuthi lomsebenzi usuthatha isikhathi esinigi kakhulu, sengihlale ngimatasa nsuku zonke.
‘Ngithanda umphakathi wazi ukuthi ubizo luyinto enzima ukuzehlukanisa nayo. Kuningi esekwenzekile kimi ngizama ukulibalekela.
‘Sengike ngaba sezingozini zemoto amahlandla ahlukene, njengoba bengizama ukuziqhelanisa nakho. Selokhu ngimukele ngokugcwele lomsebenzi abantu baphuma bengena bezobonga izinto esenzeke ezimpilweni zabo, ngokusebenzisa amakhathakhatha ami.
‘Konke lokhu kuyisiphiwo sabakithi kanye noNkulunkulu, ukwelapha ngokwesintu kuyinto eyadalwa nguNkulunkulu, kunzima kukubalekela, njengoba nathi singazikhelelanga ukuba ngabantu abamnyama, nokuza emhlabeni,’ kubeka uDkt Dlamini.
Uqhube wathi yena usebenza ngendlela yakhe ehlukile,futhi akajahi imali nodumo, kodwa weneliswa ukusinda nokuthokoza kweziguli zakhe.
‘Ngingathanda nje okuxwayisa umphakathi uqaphele abantu abathi bayelapha babize nemali emba eqolo. Kungashona ilanga uma ngingachaza ukuth ngelapha nhloboni yezifo, kodwa okuningi abantu bengakuthola ezinkudleni zokuxhumana,’ kuphetha uDkt Dlamini Ikhosi.
Gospel singer answers ancestral calling