Infanterieskool se dag van stadsvryheid
Die Oudtshoorn Infanterieskool het verlede Vrydag met ‘n indrukwekkende parade en magsvertoon in Baron van Reede- en Hoogstraat gebruik gemaak van sy Vryheid van die Stad-status wat reeds in 1977 deur die Oudtshoornmunisipaliteit aan die eenheid toegeken is.
Die hoof van personeel van die SANW Infanterie Formasie, brig. genl. Bhasi Gqoboka, het die munisipaliteit en inwoners van Oudtshoorn bedank vir die jare lange samewerking met en ondersteuning aan die Infanterieskool.
Die uitvoerende burgemeester,
Colan Sylvester, het in sy toespraak gesê die munisipaliteit sal voortgaan om ‘n hand van vriendskap na die Suid Afrikaanse Weermag Infanterieskool uit te reik en is trots daarop om die skool reeds 55 jaar op die dorp te kan hê.
“Hierdie eer moet deur almal van ons met die grootste respek en verantwoordelikheid bejeën word om sodoende vooruitgang vir almal te verseker.
“Ons waardeer die diens wat die Infanterieskool aan die gemeenskap van Oudtshoorn en Suid Afrika in die breë lewer, asook die onselfsugtige vredesrol wat hy in Afrika speel.
“Ons neem vandag ook die geleentheid om die SANW se heldedade te loof nie net om ons land veilig te hou nie, maar ook ten opsigte van stabiliteit in Afrika.”
Die burgemeester het die hoop uitgespreek dat die munisipaliteit en die SANW voortdurend sal saamwerk om te help met die groei van die Infanterieskool om dit die beste Infanterieskool in Suid-Afrika te hou ten opsigte van opleiding, opvoeding en ontwikkeling.
Volgens Gqoboka het die Infanterieskool die ondersteuning van die plaaslike munisipaliteit nodig om suksesvol te kan wees.
“Die toekenning van die Vryheid van die Stad is ‘n groot eer en dit is slegs met samewerking dat meer bereik kan word ten opsigte van vordering en vooruitgang.”
Die Vryheid van die Stad is reeds op 15 Desember 1977 deur die Oudtshoornmunisipaliteit aan die Infanterieskool toegeken en word jaarliks in Oktober deur die skool uitgeoefen.