Meer as 30 skrywers deel hulle passie by Leesfees
Die boekgesprekke van meer as 30 skrywers die afgelope naweek by die sewende Prins Albert-leesfees, het gewissel van memoirs en aktualiteit, geskiedenis en politiek, tot misdaad, digkuns en persoonlikheidstoornisse.
En, elk van dié onderwerpe is ewe goed ontvang, met goeie bywoning deur plaaslike inwoners sowel as gaste van elders.
Die skrywers het van Vrydag tot Sondag op die dorp saamgetrek om van die toppublikasies van 2018 te bespreek. Die hoogtepunt was die oorhandiging van ’n kultuurtoekenning aan die gewilde spanningsromanskrywer Deon Meyer deur die Wes-Kaapse regering, spesifiek vir sy bydrae tot die skryfkuns. Minister Anroux Marais, minister van sport en kultuursake, het die toekenning aan hom oorhandig en ook die fees amptelik geopen.
Meyer, wie se jongste boek, Prooi, pas verskyn het, was by twee gesprekke betrokke: Hy het aan sy medespanningsromanskrywer Bettina Wyngaard meer oor sy lewe en skryfloopbaan vertel, en saam met Martin Steyn (Losprys) en Jo Nel (Die hond wat ophou blaf het) opgetree om oor hul afsonderlike werkwyses in dié spesifieke genre te gesels.
Wyngaard se volgende spanningsroman, Jagter, verskyn vroeg aanstaande jaar.
Dit was ook ‘n naweek van musiek, met die orkeste Hatchetman en Orwellington wat opgetree het, die digtersanger Jolyn Phillips, Oom Hannes Coetzee en ghoemadigter Loit Sôls, en rymkletsers van die Hoërskool Zwartberg.
Tydens die jeugprogram het die jeugskrywers Anzil Kulsen en Simon Bruinders aangrypend vertel hoe hulle deur dryfkrag en geloof in hulself hul loopbaan gebou het, en die “performance poet” Gaireyah Fredericks het gesê één mens, die digter Diana Ferrus, se geloof in haar het haar geleer om in haarself te glo. Jy is nooit die slagoffer van jou omstandighede nie, is haar lewensbenadering.
Vanjaar se Leesfees is, volgens vroeë statistiek, beter bygewoon as ooit. Volgens die organiseerders kan dit toegeskryf word aan beter reklame, beeldbouaksies en omdat die fees goed gevestig is. Die verskuiwing van die fees na ‘n groter feesperseel by die Prins Albert-skouterrein was ook ‘n goeie besluit aangesien die nuwe terrein hom beter leen tot groot gehore.
Die fees is voorheen gehou in die Jans Rautenbach Schouwburg in die dorp, maar het dit geleidelik ontgroei.
Voorts het vanjaar se fees volop te eet en te drink gebied, met musiek as agtergrond om atmosfeer te skep.
Die oogmerk was om mense tuis te laat voel sodat hulle deel sal voel van ’n boeken-leeservaring, met die geleentheid om persoonlik kennis te maak en saam te kuier met hul geliefkoosde skrywers.
Op die gebied van toerisme het die fees ook goed gevaar – bykans elke moontlike gastehuis en die hotel was volbespreek.
En, elk van dié onderwerpe is ewe goed ontvang, met goeie bywoning deur plaaslike inwoners sowel as
gaste van elders.