Nuwe Afrikaanse skool vir PA
Prins Albert het verlede Woensdag, op die eerste skooldag van die jaar, ’n nuwe skool ryker geword.
Christen Akademie is ’n privaatskool met Afrikaans as voer- en onderrigtaal. Die skool is by die Wes-Kaapse Onderwysdepartement geregistreer. Die dorp het reeds ’n Engelse privaatskool, Albert College en twee staatskole, Hoërskool Zwartberg en Prins Albert Primêr.
Drie onderwysers en meer as twintig leerders het Woensdag ingeval en nog aansoeke om toelating is ontvang, het die skoolhoof, Lenor Snyman, gesê. Sy is ook die klasonderwyser van die senior klasse (graad 4 tot 8). Die ander onderwysers is Bianca Luttig (graad 1 tot 3) en Lydia Marais (graad RR en R).
’n Groot groep Prins Alberters het die openingsgeleentheid bygewoon. Jan-Chris Marais, voorsitter van die stigtingskomitee, het gesê ’n vaste beheerliggaam word ná die einde van die eerste kwartaal gekies, sodra ouers na vore kom om op dié liggaam te dien.
Marais het die bestuur van die Prins Albert-landbouskou bedank omdat dié liggaam die SPS Luttig-saal op die perseel vir die vestiging van die skool beskikbaar gestel het. Tydelike klaskamers is binne die saal gebou en ’n omheinde speelterrein is buite aangelê. Daar is ook reeds op skooldrag besluit.
Die vorige hoof van Hoërskool Zwartberg, Kobus Snyman van Merweville, het ’n lint geknip om die skool oop te verklaar. Hy is die eggenoot van Lenor Snyman en was jare gelede die skoolhoof van verskeie van die ouers van die hoërskool, onder andere Marais.
Dr Gerdrie van der Merwe, bekende kerkhistorikus en aflospredikant by die NG kerk Prins Albert, het gesê alle goeie idees begin klein. “Jy begin êrens, jy gee die eerste treë. Dié skool maak vanoggend geskiedenis en dit gaan groei. Dit gaan die grondslag wees van leiers, van mense wat ’n verskil in die samelewing gaan maak.”