Selfoonroofsaak uitgestel
Uitspraak in die saak teen twee mans van Bridgton wat glo twee vriende van hul selfone beroof het, is Vrydag in die Oudtshoorn-streekhof uitgestel omdat die landdros meer inligting ten opsigte van een van die beskuldigdes wil bekom.
Hogan Pêrel en Burswell Stanley word daarvan aangekla dat hulle die oggend van 20 Augustus 2017 vir Marcello Prins en Nigel Jaftha van drie selfone beroof het.
Albei pleit onskuldig en beweer dat hulle nie van so ‘n voorval bewus is nie.
Volgens Prins was hy en Jaftha omstreeks 04:00 van ‘n taverne in Bongolethu onderweg huis toe, toe hulle deur die twee beskuldigdes en nog ’n verdagte, wat nie voor die hof gebring is nie, beroof is. Hulle is met ‘n skêr en ‘n mes gedreig.
Die staatsaanklaer Willem Vister, het vir skuldigbevinding gevra omdat Pêrel en Stanley aan die klaers bekend is en maklik geïdentifiseer kon word. Die straatligte het gebrand en hul gesigte was nie bedek nie.
Die derde verdagte se gesig was met ‘n doek bedek.
Die beskuldigdes se regsverteenwoordiger, Wenzel Botha, het vir hul vryspraak gevra omdat dit onwaarskynlik is dat mense onder ‘n lig iemand sal probeer beroof.
Streeklanddros Ntsoki Moni het uitspraak Vrydag tot 22
Julie uitgestel omdat sy meer besonderhede van Pêrel wil bekom.