’n Lewe vir ’n sigaret
'n Woordewisseling oor ’n sigaret tussen twee broers van Ladismith het die een broer sy lewe gekos. Reduaan Reshaad Afrikaner (33) is op Sondag 3 Mei op die toneel in Nissenville, Ladismith, dood toe hy met 'n sekel in die nek gesteek is. Volgens inwoners het die twee mans oor 'n sigaret gestry toe die jonger broer vir Afrikaner met 'n sekel gesteek het.
"Binne oomblikke was die hele straat vol nuuskieriges. Trane het gevloei omdat dit nie die bedoeling was om Waanie te steek nie, maar net om hom skrik te maak,” het ‘n familiekennis vertel.
Afrikaner was voorheen ‘n student aan die Universiteit van Wes-Kaapland, maar moes as gevolg van persoonlike omstandighede sy studies staak. Kapt. Malcolm Pojie, SuidKaapse-polisiewoordvoerder, het by navraag gesê: “‘n Moorddossier is geopen. Die oorledene en die verdagte het ‘n argument gehad waarop die verdagte die oorledene in die nek gesteek het.
“Die ambulans is ontbied, maar die oorledene het beswyk voor hy na die hospitaal geneem kon word. Die 27-jarige verdagte is gearresteer en sal op aanklag van moord in die hof verskyn.”
Met ter perse gaan was die verdagte nog nie in die hof nie en is op 'n waarskuwing vrygelaat tot en met die hofverskyning. Kaptein Henry Edwards, hoof van sigbare polisiëring op Ladismith het 'n beroep op inwoners gedoen om "asseblief verdraagsaam te wees in hierdie tyd van inperking.”