Hofbevel vir beslaglegging op Rabie-egpaar se bates
Die Nasionale Vervolgingsgesag (NVG) het ingevolge ‘n hofbevel ‘n kurator bonis aangestel om beslag te lê op die bates van ‘n egpaar van Oudtshoorn, Marthinus en Johanna Rabie, wat teregstaan op 34 klagtes van bedrog waarby miljoene rande betrokke is.
Die staat beweer dat Marthinus Rabie, ‘n voormalige tegnikus in diens van die Wes-Kaapse departement van landbou by die Oudtshoorn-proefplaas, sy vrou se twee beslote korporasies, Attaqua en Gwaiing Ontwikkelings, tussen 2006 en 2008 bevoordeel het met die toekenning van tenders. Hulle het hulself daardeur, volgens die staat, onregmatig verryk en begunstigdes benadeel.
Marthinus ontken dat hy fisies betrokke was by projekte van sy vrou. So byvoorbeeld ontken hy die getuienis van ‘n pa en seun van Matjiesrivier, Dermorney en Johan Wicomb, dat hy hulle met die staat se voertuig vanaf die Oudtshoorn-proefplaas na Zoar vervoer het waar hulle vir Attaqua gewerk het.
Voorts ontken hy dat hy olyfboompies by Hoërskool Ladismith aangeplant het, terwyl sy vrou nie eens teenwoordig was nie. Hy ontken ook dat hy ander amptenare van die departement weggehou het van die projek.
Die NVG het Alon Kowen van Pure Capital, as kurator aangestel wat nou beslag kan lê op die egpaar se bates hangende die uitslag van die saak wat nou reeds jare voortsleep. Indien die staat suksesvol is met ‘n skuldigbevinding, sal die eiendom waarop beslaggelê is, verkoop word en die opbrengs in die Kriminele Bate Herwinningsrekening (CARA), ‘n spesiale rekening binne die Nasionale Inkomstefonds (NRF) inbetaal word.
Indien die staat onsuksesvol is, sal die bates aan die beskuldigdes terugbesorg word.
Die saak word deur streeklanddros Daniel Boks aangehoor en is met die beskuldigdes se laaste verskyning twee weke gelede, tot 9 Oktober uitgestel nadat hulle die mandaat van hul regsverteenwoordiger tot dusver, Gideon Badenhorst, beëindig, en ‘n nuwe regsman, Henry van Breda, aangestel het.
Die twee is op waarskuwing vrygelaat.