Opleiding op sypaadjie ná inbraak by sentrum
HOFMEYR - Nie eens ‘n inbraak by die niewinsgewende organisasie Hofmeyr Hugs of Hope kon hul beplande opleidingskursusse verhinder nie. Met die polisie steeds op die toneel, is die opleiding in die ope lug op ‘n sypaadjie aangebied.
Retha Smit, rekenmeester van
Hugs of Hope, sê hulle sou verlede Woensdag 1 September met kreatiewe herwinningsopleiding begin en terselfdertyd ook ‘n volbespreekte Educare-kursus aangebied het. Die oggend net vóór die aanvang van die kursusse het ons uitgevind dat inbrekers die vorige nag toegang tot die gemeenskapsentrum verkry het en verskeie artikels gesteel het.”
Die hele kompleks is deur die polisie afgesper en beveilig in afwagting op die vingerafdrukspan, wat vanaf Middelburg moes deurkom,” sê Willem Hänket, terreinbestuurder van die kompleks.
Maar die vroue van Hugs of Hope is planmakers en binne minute is twee buitekamers oorkant die straat ontruim vir die herwinningsopleiding, maar toe daag daar meer belangstellendes op as waarvoor daar plek in die ontruimde lokale is.
“Ek was bekommerd toe ek opdaag om met opleiding te begin,” vertel Elsa About, ‘n Educare-opleier. “Dit was egter ‘n heerlike, sonnige lentedag en die opleiding is sommer op die sypaadjie onder die dennebome aangebied.
“Die ruim naaldwerkopleidingslokaal is egter vinnig tot ons groep se beskikking gestel en opleiding kon sonder enige oponthoud ‘n aanvang neem.”
Die Hofmeyr-polisie was vinnig op die toneel en verskeie verdagtes is reeds in hegtenis geneem. Verskeie artikels van die NGK Hofmeyr-gemeente en van Hofmeyr Hugs of Hope is tydens die inbraak gesteel.