OPL Kings slag vir George
Oudtshoorn se OPL Kings-vlakkiekrieketspan het die afgelope naweek in Conville, George, die tuisspan oortuigend in albei hul kragmetings geklop.
Die wedstryd is op ‘n lowergroen veld gespeel, iets waaraan die Oudtshoorniete nie in hul eie dorp gewoond is nie omdat alle wedstryde tuis op dorre velde gespeel word. Soos verwag het die manne sierlik vir elke vangskoot geduik met die wete dat sy bestemming ‘n sagte groen bed is.
Eerste wedstryd
Die besoekers het in hul eerste wedstryd die loot gewen en besluit om eerste te kolf.
Groot was hul verbasing toe hulle besef dat die sement kolfblad se wispelturige aard ‘n groot invloed op albei wedstryde sou hê.
Die Kings se twee openingskolwers Ruaan Fielies en Willem Goliath het hulle goed van hul taak gekwyt en onderskeidelik 30 en 20 lopies aangeteken vir ‘n goeie grondslag waarop die middelorde kon bou.
Die middel- en laerorde kon egter nie aan die gang kom nie. Die Kings is uiteindelik vir ‘n ietwat teleurstellende 71 lopies almal in die 19de boulbeurt uitgeboul wat beteken het dat George ‘n haalbare vier lopies per beurt moes handhaaf vir ‘n oorwinning.
Soos met enige krieketwedstryd kan geen voorspellings vooraf met sekerheid gemaak word alvorens albei kolfordes op dieselfde blad gekolf en geboul het nie en die Kings se boulers het nie teleurgestel nie.
Goliath tesame met Zaen May het verwoesting met die bal in die hand gesaai en was grotendeels verantwoordelik dat die tuisspan vir 52 lopies in die 17de boulbeurt uitgeknikker is. Kings wen dus met 21 lopies.
Tweede wedstryd
In die tweede wedstryd het die Kings weereens die loot gewen en 136 lopies vir die verlies van vier paaltjies op die telbord geplaas. Goliath (31) en Fielies (27) was weereens die toplopiemakers vir hul span met die middelorde wat ook stewige bydraes gelewer het. George was van bal een af onder enorme druk om die lopietempo van bykans sewe per boulbeurt vol te hou en kon uiteindelik slegs 43 lopies almal uit in die 15de boulbeurt bymekaarskraap.
Kings wen dus die tweede wedstryd met 90 lopies.