Icosa beheer nou Odn-raad
Dit wat reeds verlede jaar in Augustus deur sommige voorspel is, het Vrydag gebeur toe die DA se koalisie-vennote hulle by die ANC geskaar het en die DA-burgemeester en -speaker verwyder het.
Die DA se besluit verlede jaar om hande te vat met drie kleiner partye en sodoende aan bewind in Oudtshoorn te bly, het hulle Vrydag aan die hak gebyt toe mosies van wantroue teen Chris Macpherson, uitvoerende burgemeester en Julia le Roux, speaker, deur 13 van die 25 raadslede goedgekeur is. Vlancio Donson en Barbara Owen van die Independent Civic Organisation of South Africa (Icosa) is onderskeidelik as burgemeester en speaker aangestel.
Die aanloop tot die DA se verlies aan leierskap het reeds verlede jaar begin toe vier van hulle raadslede bedank het en hulle slegs een setel in die tussenverkiesing kon inpalm. Om aan bewind te bly moes die DA noodgedwonge ‘n koalisie-hand na ander partye uitsteek om die ANC teë te staan. ‘n
Samewerkingsooreenkoms is toe met die vier raadslede van Icosa (2), Sarco (South African Religious Civic Organisation) (1) en die EFF (1) gesluit. Met daardie ooreenkoms kon die DA se 12 raadslede saam met die ander vier die ANC se nege troef.
Ooreenkoms ly skipbreuk
Krake het egter sowat drie maande gelede begin wys toe ‘n mosie van wantroue in die burgemeester en speaker op 7 Junie voor die raad sou dien. Die mosies is egter op die nippertjie onttrek. Die eerste spyker in die koalisie-kis is egter tydens ‘n raadsvergadering op 27 Augustus geslaan toe Icosa, Sarco en die EFF saam met die ANC besluite geneem het om die waarnemende munisipale bestuurder, Reginald Smit, te vervang met Walter Hendricks wat tans in ‘n hofsaak met die George-munisipaliteit betrokke is. Verskeie ander personeelverskuiwings is ook tydens die vergadering gemaak, maar die hof het intussen daardie besluite ter syde gestel.
Die laaste spykers is verlede Vrydag ingeslaan toe die mosies van wantroue in die afwesigheid van die 12 DA-raadslede aanvaar is. Julia le Roux kon nie die vergadering bywoon nie aangesien sy siek was en volgens Macpherson het die ander DA-raadslede besluit om nie die vergadering by te woon nie aangesien hulle glo onder die indruk was dat die besluite wat deur die hof ter syde gestel is, weer sou dien.
Hy het gesê dat die DA nie by ‘n “onwettige vergadering” betrokke wil wees nie, maar het nie gereageer op ‘n vraag of hulle die vergadering soos wat dit plaasgevind het, steeds as “onwettig” beskou nie. Hy het egter gesê dat die DA die demokrasie ondersteun en die meerderheidsbesluit van die raad aanvaar.
Aangesien Le Roux nie Vrydag in haar pos as speaker beskikbaar was om die mosies te hanteer nie, het die onderburgemeester, Gevan Juthe (Sarco) die Wes-Kaap se minister van plaaslike regering, Anton Bredell, versoek om ‘n persoon te stuur om tydens die vergadering die verkiesing van ‘n nuwe speaker te fasiliteer. Dean O’Neill, munisipale bestuurder van Overstrand, het toe Vrydag voorgesit tydens die aanwysing van ‘n interimspeaker, Jongelizwe Tyatya (ANC), wat die mosies hanteer het.