Verdagte in PP Kafee-roof vasgetrek
OUDTSHOORN - ‘n Man is Dinsdag in verband met die roof op 25 Augustus by PP Kafee in Reserwestraat in hegtenis geneem.
Oudtshoorn Courant het vroeër die maand berig die vrou wat in die winkel werk, het gesê sy en die vermeende rower het die dag voor die roof ‘n woordewisseling oor koeldrank gehad.
Hy het glo die volgende dag teruggekeer en volgens die vrou oor die toonbank gespring, haar geskop en op haar skouer getrap waarna hy twee selfone en haar beursie met onder meer R500 gesteel het.
Die Oudtshoorn-polisie het dié week ‘n gesigsamestelling van ‘n man, wat vermoedelik die verdagte kan wees, vrygestel.
Volgens kapt. Louis Visser, woordvoerder van die Oudtshoorn-polisie, is dié samestelling onder lede ook versprei.
“’n Lid van ‘n sekuriteitstroep het ‘n verdagte persoon in ‘n woonbuurt opgemerk waarna hy die foto op ‘n WhatsApp-groep geplaas het en die verdagte volgens die gesigsamestelling uitgeken is. ‘n Formele uitkenning van die verdagte deur die klaer moet nog gedoen word en die ondersoek duur voort.”
Volgens Visser sal die verdagte die week in die hof verskyn.
“Brig. Susan Crafford, die stasiebevelvoerder, het haar waardering teenoor al die betrokke partye uitgespreek. Daar is goeie samewerking en skakeling tussen die polisie en die sekuriteitsmaatskappye wat ‘n groot verskil maak wanneer dit by bekamping en oplos van misdaad kom,” het Visser gesê.