Harlequins slag Black Lion
Die Oudtshoorn Infanterieskool se Harlequins Magte-rugbyklub het verlede Saterdag op hul tuisveld vir Black Lion van Thembalethu (George) 'n rugbyles soos min geleer in die SWD Eersteliga-Oos se halfeindstryd met 'n oorwinning van 66 - 16.
Beide spanne het van die staanspoor af aanskoulike hardlooprugby gespeel tot groot vermaak van die groot skare teenwoordig.
Alhoewel daar nie juis 'n noemenswaardige oorheersing van enige span se pak voorspelers te bespeur was nie, was Black Lion se eerste linie verdediging gereeld aan bande gelê waarvoor hulle 'n duur prys betaal het. Harlequins het met rustyd welverdiend met 27 - 6 voorgeloop met die wedstryd se uitslag so te sê 'n uitgemaakte saak. In die tweede helfte was dit eenrigtingverkeer met Harlequins wat die een drie na die ander ingeryg het.
Black Lion het egter tot die einde met sy avontuurlustige, sjampanjerugby volgehou en is met 10 minute se spel oor, beloon met 'n pragdrie. Harlequins was egter vasbeslote om die laaste sê te hê in hierdie wedstryd toe hulle die wedstryd met twee drieë afgesluit het. In totaal het Harlequins 'n allemintige 10 drieë in die wedstryd gedruk.
Puntemakers vir Harlequins
Glenwill Lewis het drie drieë gedruk met Jaylin Pretorius, Rhupino Plaatjies, Chris Snyman, Adrian Donson en Pat Meyer wat elke een drie gedruk het. Romano Ewerts het twee keer agter die pale gaan kuier. Pretorius was suksesvol met twee strafskoppe en vier doelskoppe. Juan Dido het een doelskop oorgeklits.
Harlequins speel eerskomende naweek, 24 September, op Outeniquapark in George in die eindstryd teen Uniondale.