1954 Chev Belair-koepee die perfekte koets vir Erfenistoer
Niel Kasselman sê hy vry al vir ‘n lang tyd na die wonderlike ou motor wat hom en drie van sy familielede tydens vanjaar se Erfenistoer - die Suid-Kaap-oumotorklub se jaarlikse uitstappie ter viering van Erfenismaand, en Suid-Afrika se veelsydige motorerfenis - gaan vervoer.
Niel is stigter en bestuurder van die suksesvolle George maatskappy, OJanna Distributors - die goue borg van Erfenistoer 2022. En op 22 September (vandag) sal hy gereed wees om die pad te slaan vanaf die toer se amptelike vertrekpunt by Halfway Toyota in Knysnaweg, George en van daar na verskeie dorpe in die Klein-Karoo, Karoo en na van die beste wynstreke in die Wes-Kaap.
Chevy-droom bewaarheid
Niel en sy vrou, Ria, gaan vanjaar se toer aflê met hul dogter Nadia en skoonseun, Frikkie van der Merwe, as deel van hul toerparty in die kundig gerestoureerde 1954 Chevrolet Belairkoepee. Die ‘kinders’ sou deelneem in hul eie motor, maar dié statige senior dame – ‘n 1957 Wolseley 15/50 – het enjinprobleme ondervind en hulle dus genoodsaak om by Ria en Niel in die Chev aan te sluit.
“Hierdie uiters skaars voertuig was vir baie jare my droommotor. Op die rype ouderdom van 58 kon ek dit toe uiteindelik in die hande kry,” sê Niel, en voeg by dat die motor in 2019 heeltemal herbou is en die sessilinderenjin vervang is met ‘n V8 Oldsmobile Rocket en TH400 outomatiese ratkas.
“Ek het so byna die motor in 2020 kon koop, maar het daardie geleentheid met
twee gemis toe ‘n versamelaar genaamd André Fourie van Hartbeespoortdam my voorgespring het. André het die motor besit tot begin vanjaar, toe hy besluit het om te verkoop omdat hy eintlik 'n bakkieman is en nou daarop fokus om soveel as moontlik ou bakkies te bekom.
“Toe die Chevy op die mark verskyn, het ek dit dadelik gekoop sonder om eers te gaan kyk, want ek het die kar so goed geken. Dit is van meet af aan deur Coastal Customs in Mosselbaai herbou.”
Niel sê die motor is “werklik oorspronklik” en perfek bewaar, al het dit 'n enjin wat aangepas is om 'n bietjie groter en sterker te wees. Van sy aantreklikste kenmerke is dat die Belair pragtig geverf is in swart pêrelmetaal, met ‘n smaakvolle roomkleurige dak.
Dors maar nie nors
Niel sê sy ou motor ry soos 'n droom, maar hy moet toegee dat die dame redelik dorstig is: vir elke liter brandstof ry mens maar 5,5 km. Daar is egter baie versagtende omstandighede, onder andere die feit dat Ria ewe verlief is op hul Chevy.
"Ons ken mekaar sedert 1980 en is in '84 getroud," vertel Niel. “Ons het drie kinders en ses kleinkinders, en almal van hulle is absoluut oukar-mal.” Dis dus heeltemal gepas dat Ria, Nadia en Frikkie almal Erfenistoer ‘22 gaan meemaak in hierdie familie-vriendelike koets.
Fyn pikkewyn
Multi-Fine Products is trots om deel te wees van die Suid-Kaap-oumotorklub se 10de Erfenistoer, van 22 tot 25 September. Die pret begin op 22 September (vandag) by Halfway Toyota in George, voordat daar vertrek word na Oudtshoorn, De Rust, Prins Albert en Matjiesfontein.
Dag twee sluit die dorpe Ceres, Tulbagh, Porterville, Velddrif en St Helenabaai in, met dag drie se roete wat verby Vredenburg, Windmeul, Worcester, Robertson en Montagu lei.
Die laaste dag op 25 September sal Erfenistoer-bestuurders per Barrydale, Tradouwpas, Buffeljagsrivier en Riversdal na George terugkeer.
Wes-Kapenaars moet kennis neem dat hierdie unieke vloot eksklusief bewonder kan word tydens verversingstoppe in Prins Albert, Matjiesfontein, Tulbagh, St Helenabaai, Windmeul en Montagu.
Die 26ste George-oumotorskou word beplan vir 11 en 12 Februarie 2023. Kontak mimi@gojipr.net of skakel 084 583 3144 vir meer inligting.